Ыам ыйын 5 күнүгэр 1995 сыллаахха Бүлүү куоратыгар, саҥа олоҕу олорон эрэр эдэркээн милиция сотруднига Никифоров Конон Николаевич, бар дьонум иллээх-эйэлээх олоҕун кѳмүскүѳм диэн сырдык тыына быстыбыта. 1996 сыллаахха Арассыыйа бирисидиэнэ Б.Н.Ельцин ыйааҕынан хорсун быhыытын үрдүктүк сыаналаан, улууска бастакынан «Эр санааланыы» уордьанынан наҕараадаламмыта. Куонаан сырдык аатын үйэтитэн, үүнэр кѳлүѳнэҕэ, ыччакка чѳл олоҕу пропагандалаан, оҕоҕо спорка интэриэhи үөскэтэн, эт-хаан ѳттүнэн сайыннаран, байыаннай, париотическай тыыҥҥа тулуурдаах, дьаныардаах, үлэни тиhэҕэр тириэрдэр үөрүйэхтэри иитэн, Баппаҕаайы оскуолата 95 сылыгар, Россияҕа дьиэ кэргэн, Саха сиригэр Оҕо саас сылларыгар аналлаах, үгэскэ кубулуйбут регионнааҕы байыаннай — спортивнай «Я патриот» күрэх буолан ааста.
Күрэххэ Бүлүү улууhуттан Хампа, Бөтүҥ, Лөкөчөөн, Чинэкэ, Баппаҕаайы икки хамаандата, Горнайтан Кэптин, Кэбээйиттэн Мукучу оскуолалара алталыы киhилээх 8 хамаанда кытынны ыллылар.
Бастакы этабынан ыытыллыбыт, хамаанданы билиhиннэрии түмүгүнэн, «Бастыҥ визитка» анал ааты ылары ситистэ Чинэкэ орто оскуолатын «Пламя» хамаандата. Иккис этапка отут сѳкүүндэ иhигэр уолаттар приседаниеҕа, кыргыттар скакалкаҕа күрэхтэстилэр. Ол кэннэ «АК-74» автоматы маҕаhыынын ииттилэр. Манна кыргыттарга бастыҥ Баппаҕаайы орто оскуолатыттан Федорова Нарыйаана, уолаттарга Кэптин орто оскуолатыттан Тимофеев Арсен буоллулар. Салгыы «АК-74» автоматы ыhыыга, хомуйууга күрэхтэстилэр, манна Чинэкэ орто оскуолатын «Пламя» хамаандатыттан кыргыттарга Николаева Сайаана, уолаттарга Макаров Вадим бастыҥ ааты ыллылар. Бэhис этапка бастакы көмөнү оҥорууга күрэхтэстилэр. Онтон уолаттар биэстии мүнүүтэҕэ перекладинаҕа күүстээх эрчиллиилэрин кѳрдѳрдүлэр (КСУ), манна бастыҥ ааты Баппаҕаайы орто оскуолатыттан Борисов Иван ылла; кыргыттар отут сѳкүүндэ иhигэр пресс хачайдаатылар, бастыҥнарынан Кэбээйи Мукучутуттан Афанасьева Кристина буолла. Саамай тыҥааhыннаах кѳрүҥүнэн сымсаны, дьаныары, тулууру, хамаанда биир тыыннаах буоларын кѳрдѳрѳр, моhоллору туорааhын күрэҕэ буолла.
Күрэхтэhии түмүгүнэн, 1 миэстэ — » Молодая гвардия» Баппаҕаайы орто оскуолатын бастакы хамаандата, салайааччы Иванов Д.М.; 2 миэстэ — «Бэдэр» Мукучу орто оскуолата, салайааччы Николаева В.Н.; 3 миэстэ — «Пламя» Чинэкэ орто оскуолата, салайааччы Протопопов В.В.; 4 миэстэ – «Кыайыыга дьулуурун иһин» анал ааты ыллылар «Барс» Кэптин орто оскуолата, салайааччы Скрыбыкин К.К.
Маны таһынан анал ааттар бэрилиннилэр: «Саамай эдэр кыттааччы» — Иванов Дамир, «Барс» хамаанда, Баппаҕаайы орто оскуолата; «Бастыҥ салайааччы» — Иванов Дмитрий Маркович Баппаҕаайы орто оскуолата.Бастыҥнар грамотанан, мэдээлинэн, бирииһинэн наҕараадаланнылар.Түмүккэ, махталбытын тиэрдэбит үбүнэн кѳмѳлѳспүт спонсордарбытыгар: Конон Никифоров бииргэ төрөөбүттэригэр, аймахтарыгар, Баппаҕаайы олохтоох дьаһалтатын баһылыгар Николаев Егор Афанасьевичка, Бүлүүтээҕи ис дьыала отделын полициятыгар, Конон бииргэ үѳрэммит доҕотторугар, «Үнүгэс» маҕаһыын хаhаайкатыгар Данилова Аина Алексеевнаҕа, Баппаҕаайы оскуолатын директорыгар Алексеев Прокопий Анатольевичка, Баппаҕаайы орто оскуолатын эбии үөрэхтээһинин педагогар Афанасьева Марина Ивановнаҕа, физкультура учууталыгар Иванова Мария Константиновнаҕа.
«Я Патриот» күрэх тэрээһинигэр сүүрбүт-кѳппүт Баппаҕаайы орто оскуолатын коллективыгар, кыттар оҕолору бэлэмнээбит салайааччыларга, күүс-кѳмѳ буолбут «Алаһа» сынньалаҥ киин үлэhиттэригэр, аhынан хаччыйбыт повардарбытыгар, олохтоох дьаһалта коллективыгар улахан махталбытын биллэрэбит.
Маннык күрэхтэһиилэр ыытыллаллара билиҥҥи бириэмэҕэ ордук тоҕоостоох, кэнчээри ыччаттарбыт Ийэ дойдуга бэриниилээх, хорсун – хоодуот буола улааталлар.
Андреева Д.Н.
М.А.Алексеев аатынан Баппаҕаайы оскуолатын учуутала,
Илбэҥэ, Бүлүү.