Сэтинньи 18 күнүгэр биһиги оскуолабыт VI кылааһын үөрэнээччилэригэр «Дьоһуннааҕы кэпсэтии» дьарык буолан ааста. Бүгүҥҥү кэпсэтии «Үтүө дьыала» тиэмэтигэр ананна. Уруогу кылаас салайааччыта Елена Петровна Иванова иилээн-саҕалаан ыытта.
Елена Петровна үтүө киһи диэн хайдах киһини ааттыылларын туһунан биһигиттэн, кылаас оҕолоруттан ыйытта. Ол кэнниттэн саха норуотун суруйааччыта Суорун Омоллоон «Доҕордуулар» диэн кэпсээнин аудионан иһитиннэрдэ. Айымньы сүрүн героя Стасик ууга түспүт табаарыһын көрөн, куттаммакка, өр толкуйдаабакка быыһаан киирэн барар. Кинилэри ыраахтан биир табаарыстара бэлиэтии көрөн, кэлэн көмөлөһөн, табаарыстарын быыһыыллар. Онон бу кэпсээн хорсун быһыыны, үтүө дьыаланы, доҕордуулар күүстээх, үтүө санаалаахтарын көрдөрөр.
Онтон учууталбыт кып-кыра да үтүө санаа кыһалҕалаах дьону үрдүккэ сирдиирин холобурдаан кэпсээтэ. Ити курдук, уруок түмүгүнэн үтүө дьыала үтүө санааттан тахсарын, дьоҥҥо үтүөнү баҕарыы, бэйэ-бэйэҕэ көмөлөсүһүү көмүстээҕэр да күндү буоларын өйдөөтүм.
Бу кылаас чааһын туһунан үөрэнээччилэртэн санааларын үллэстэллэригэр көрдөстүм.
Виолетта Барашкова:
– Үчүгэй уруок буолла. Учууталбыт үтүө санаа туһунан видео көрдөрдө, коррекционнай оскуола туһунан кэпсээтэ. Ону таһынан доҕордуулар тустарынан кылгас остуоруйаны иһитиннэрдэ. Кырдьаҕас дьоҥҥо, кыра оҕолорго, ийэҕэ, аҕаҕа ис сүрэхтэн көмөлөһүү үтүө дьыала, убаастабыл бэлиэтэ.
***
Дарина Яковлева:
– Олус үчүгэй уруок буолла. Үтүөнү оҥоруу туохтан да үчүгэй буоларын биллим. Суорун Омоллоон кэпсээнин сөбүлээн иһиттим. Бу кэпсээнтэн доҕотторбор ыарахан түгэннэригэр күүс-көмө буолар наадатын өйдөөтүм.
***
Виолетта Захарова:
– Бу уруоктан үтүө санаа диэни биллим. Киһи туох да көрдөһүүтэ суох, ис санаатыттан дьоҥҥо көмөлөһөрө үтүө дьыаланы оҥоруу диэн буолар. Холобур, кырдьаҕас дьоҥҥо пакеттарын тутан биэрии бу эмиэ улахан көмө, ытыктабыл.
Сандаара ВИНОКУРОВА, VI кылаас, “Медиакласс” куруһуок,
Болот Боотур аатынан Хатылы орто оскуолата, Чурапчы