Өйдүүргүт буолуо, Элгээйи аатырбыт мусуойугар көтөр саҥатын үтүктэн экскурсия ыытар оҕону? Ол уолбут балаҕан ыйын 7 күнүгэр НТВ канаалга «Чудо» диэн оҕолор биэриилэригэр бу саас баран уһуллан кэлбитэ көһүннэ. Никита Никитин П.Х. Староватов аатынан Элгээйи орто оскуолатыгар 6 кылааска үөрэнэр, сааһа 11-рэ.
Кини 1 кылаастан научнай-практическай конференцияларга кыттар. Маны таһынан Б.Н. Андреев аатынан Элгээйитээҕи айылҕа түмэлигэр «Юный орнитолог» куруһуогар дьарыктанар, салайааччыта Сардаана Михайловна Герасимова. Научнай үлэлэлэрин көтөрдөрү чинчийиигэ аныыр, ол курдук аан маҥнайгы үлэтэ «Павлин» туһунан эбит, онтон «Дрозд-рябинник» туһунан чинчийбит, үсүһэ — «Бекасовидный веретенник» диэн үлэ.
— Ол сылдьан дьиэбит таһыгар баар ойуурга чыычаахтары көрөр, маныыр, кэтиир уонна саҥаларын үтүктэр буолбута. Никита бастаан үтүктүбүт саҥата суор саҥата этэ. Онтон үһүс кылаастан саҕалаан түмэлгэ кыралаан экскурсия ыытар буолбута, онно сылдьан көтөрдөр тустарынан кэпсиир, саҥаларын үтүктэн иһитиннэрэр этэ. Ону дьон интэриэһиргээн видеоҕа устар этилэр. Ол видеоларбыт киэҥ эйгэҕэ куйаар ситиминэн тарҕаммыта аҕай. Онтон бу дьыл олунньутугар НТВ канаалтан сибээскэ тахсыбыттара, Москваҕа «Чудо» диэн саҥа бырайыак буолар, онно кыттарга ыҥырбыттара. Съемка ыам ыйын бүтүүтэ буолбута. Никита бу бырайыакка баран элбэх оҕону кытары билистэ, биллэ-көрдө. Дойдубут регионнарыттан, атын да дойдуттан элбэх араас талааннаах оҕолор бааллар этэ. Онон оҕобут Москваттан сөҕөн-махтайан кэлбитэ, — диэн кэпсиир Никита ийэтэ Анита Трофимова.
Никита улааттаҕына орнитолог буолар баҕа санаалаах. Дьикти дьарыктаах уонна талааннаах уолга ситиһиилэри баҕарабыт!
Биэрииттэн быһа тардан:
keskil14.ru