Саха сиригэр Ⅶ норуоттар икки ардыларынааҕы «МАМОНТенок — 2024» цирковой бэстибээл буола турар.Ити тэрээһин чэрчитинэн, аан бастакытын Дьокуускай куорат Таалай күөлүнэн «Илэ уонна түүл ыккардынан» диэн канаатынан хаамыы цирковой көрдөрүү ураты түгэнэ буолла.
Бу хатыламмат киэһэ Таалай күөлгэ хаһааҥҥытааҕар да элбэх оҕо-аймах улаханныын, кыралыын муһуннулар. Канаатынан хаамыы цирковой искусство саамай ыарахан көрүҥүнэн ааҕыллар. Маннык көрүҥүнэн дьарыгырар дьону эквилибристы диэн ааттыыллар. Кинилэр ханнык баҕар ыарахан түгэҥҥэ, түөрэккэй сирдэргэ тирэх булан, бэйэлэрин кыанан турар кыахтаахтар. Тэрээһиҥҥэ СӨ культураҕа уонна духуобунай сайдыыга миниистирэ Афанасий Ноев мустубут бар дьоҥҥо маннык үтүө тыллары эттэ: «Сахабыт сирин бары оҕолоро, ыччатара бу самаан сайыммыт силигилии ситэн турдаҕына биһиги республикабыт киин куоратыгар бастакы Президеммит Михаил Николаев төрүттээбит VIII төгүлүн ыытыллар «Азия оҕолоро» спортивнай оонньуу бэлиэ түгэннэрин кэмнэригэр биһиги бу саамай хоту сытар циркабыт бу кэрэ түгэни бэлэхтээри турар. Биһиги канатоходецпыт Владимир Степанов Үөһээ Бүлүү Далырыттан төрүттээх, цирковой үөрэҕи баһылаабыт ыччаппыт эһиэхэ бэйэтин талаанын, дьоҕурун көрдөрүөҕэ. Бүгүн бачча элбэх киһи, оҕо кэлиэ дии санаабатахпыт. Үтүө мааны киэһэ саха циркэтэ хайдах курдук сайдыбытын көрүөхпүт! Бары үөрүҥ-көтүҥ, чэгиэн буолуҥ!».
Ону тэҥэ эстрада ырыаһыттара, көрдөөх клоуннар киэһэни киэргэттилэр, дьону сэргэхситтилэр. Бу маннык улахан таһымнаах акробатическай трюгу Саха Өрөспүүбүлүкэтин судаарыстыбыннай циркатын артыыһа, хапсаҕай спордун маастара Владимир Степанов Саха сирин историятыгар киирэр умнуллубат түгэни оҥордо. Оҕо-аймах бүттүүн саҥата суох төлөппүөннэрин күөрэччи таһааран, долгуйан туран уһуллулар.
Дьокуускай олохтоохторо уонна ыалдьыттара бачча кутталлаах, дьикти ол эрэн олус үөрүүлээх түгэни көрөн санаалара көтөҕүллэн үөрүү-көтүү, дьол буолан тарҕастылар! Циркэ алыптаах, аптаах киэһэтэ бар дьон кутун-сүрүн тарта!
Илон Руфова, «Азия оҕолорун» пресс киинин эдэр кэрэспэдьиэнэ