Аты кытта санаатын үллэстэр, доҕор оҥостор Тамалакаан оскуолатын 3 кылааһын үөрэнээччитэ Сайынаара Саввинова. Кини төрөппүттэригэр эппэккэ, быһа Монголугар кэпсиир, этинэр үгэстээх эбит.
Монголтан ураты икки сүүрүк аттарын Сайынаара аҕата Александр Семенович көрдөрдө. Сүүрүк аттар быһыылыын-таһаалыын уратылар, атахтара уһун, синньигэс, арҕастара үрдүк. Сайынаара сүүрүк аттары хаамтаран кэллэхтэринэ, икки чаас сынньаммыттарын кэннэ, көхсүлэриттэн, ойоҕосторуттан суокканан быылларын түһэрэн баран, кыраан уутунан, сылааҥҥанан, уу ыстаран аттарын сууйар, сөрүүкэтэр үлэлээх. Аһары баран, сайыҥҥы лааҕырга сылдьыахтааҕын аккаастаммыт. Икки убайын Арылханы, Викторы, аҕатын кытта ыһыахха сүүрүөхтээх аттары бүөбэйдэһэргэ бигэтик санаммыт.
Анал ата сүрдээх үлэһитин, истигэнин туһунан ис иһиттэн арыллан туран кэпсээтэ. Кини Монголун миинэн аҕатын кытта биир көстөөх сиргэ сылгыларын аһатан кэлэллэрин эттэ. Бэрт соторутааҕыта сылгы көрүүтүн-харайыытын туһунан ютуб-канал арыммытын, улааттаҕына улахан да улахан конюшняланыан, ат сүүрдээччи — жокей буолуон баҕарарын эбии кэпсээтэ. Биһиги хаһан да аты миинэ илик этибит, ону Сайынаара аҕатын көмөтүнэн аты миинэн дуоһуйдубут,»хорсуннар» эбиппит дии санаатыбыт. Сайынаара Монголун ыҥыырдаан миинэн, сиэллэрэн биһиэхэ көрдөрдө. Биһиги сөҕө, хайҕыы көрдүбүт уонна киэн тутуннубут.
Сайынаара үөрэҕэр үчүгэй. Минньигэс астаах остуол тула олорон Сайынаара кылыһахтаах куолаһынан туойан иһитиннэрдэ. Саха тылын-өһүн, сиэрин-туомун туһунан бэрт итэҕэтиилээхтик санаатын үллэһиннэ. Ол курдук, быдьардык тылластахха, этистэххэ, атаҕастаатахха, уордахха, төрөппүтүн тылын истибэтэххэ, Айыыһытын кэлэйиэн сөп диэн өйдөбүлү биэрдэ.
Ону тэҥэ үлэ уруогун учуутала Фёдор Петрович Иванов оччотооҕу кэм значоктарын, алта уонус сылларга үөрэммит учуобунньуктары, туттар тэриллэри муспут дьоҕус түмэлигэр ыалдьыттаабыппыт таһынан, икки коза оҕолоро баара биһиги куппутун тутта, эчи, кыраларын, мааныларын.
Ити курдук, биир саастыылаахпыт, Сайынаара Саввинова кыыс оҕо мээнэ дьарыгырбат ураты дьарыгын кытта билистибит.
Ванесса Васильева, Камилла Ноговицына, Ирена Кардашевская, Ороһу, Үөһээ Бүлүү.