Чурапчыга бэс ыйын 1 күнүгэр үөрүүлээх күн буолан ааста. Бу күн Маҕаайыга Оҕо аймах Үрүҥ Тунах ыһыаҕа, онтон улуус киинигэр Чурапчыга “Радость” оҕо дьоҕурун сайыннарар киин саҥа дьиэтэ арчыланан, хомус кутуллар дорҕоонунан үлэҕэ киирдэ.
Аны күһүн үөрэх дьыла саҕаланнар эрэ эбии үөрэхтээһин дьиэтин аанын тэлэччи арыйан, оҕолору үөрэ-көтө көрсүөҕэ.
Алгысчыт уҥа өттүгэр кыргыттары, хаҥас өттүгэр уолаттары туруоран, алгыс үтүө тылын эттэ.
Аалай кыһыл лиэнтэни улуус баһылыга Степан Анатольевич Саргыдаев, үөрэх управлениетын начальнига Юрий Павлович Посельскай, киин дириэктэрэ Ирина Семеновна Сергеева уонна киин бастыҥ иитиллээччитэ Мичил Макаров быстылар.
Дьокуускай куораттан “Юные якутяне” ресурснай киин салайааччытын солбуйааччыта Александр Романович Брызгалов ыалдьыттаата.
Кэлбит ыалдьыттар саҥа дьиэни, оҕолор айан-тутан таһаарбыт оҥоһуктарын быыстапкатын көрдүлэр.
Оннооҕор Үрүҥ эһэни кытта Горилла эмиэ эҕэрдэлэстэ, оҕо саас үөрүүтүн бэлэхтээтилэр.
Бу күн биһиги, юнкордар “Радость” киин үөрүүтүн тэҥҥэ үллэһиннибит. Дириэктэр Ирина Семёновна Сергееваны көрсөн эҕэрдэлээтибит.
– Ирина Семеновна, саҥа дьиэлэммиккитинэн эҕэрдэлиибит! Саҥа дьиэлэммит киин үлэтин ис хоһооно тугуй?
– Биллэн туран, аан бастакынан, оҕо сатабылын, дьоҕурун сайыннарыы. Саҥа дьиэбит “Творческая мастерская” диэн ааттанна. Сахалыы – “Оҕо сатабылын дьиэтэ”. Тоҕо диэтэххэ, сатабыл мастарыскыайыгар декаративнай-прикладной, оҥорон, айан-тутан таһаары куруһуоктара түмүллэн ыытыллар буолуохтара. Онон бастакы дьиэбитин “Творческая мастерская” диэн ааттаатыбыт. Бөлөҕүнэн арахсан, 110 оҕо дьарыктанар буолуоҕа. Кинилэри эбии үөрэхтээһин 21 педагога эрчийиэҕэ, дьарыктыаҕа.
“Радость” киин Чурапчы улууһун бары нэһилиэктэригэр филиаллаах, уопсайа 63 үлэһиттээх.
Оҕо дьоҕурун сайыннарар киин аатыгар да этиллэрин курдук, оҕо үөрүүтэ куруутун баар буоллун!
«Радость» киин арыллыытын туһунан видеону манна көрүҥ https://vk.com/wall-199463452_20339
Алёна КСЕНОФОНТОВА, VII кылаас,
С.Д. Флегонтов аатынан Хадаар орто оскуолата, Чурапчы
Таман Поисеев хаартыскалара, VIII кылаас, Хайахсыт
Иванна Николаева видеота, VIII кылаас, Хадаар