“Азия оҕолоро” оонньууларын Саха сирин Бастакы Бэрэсидьиэнэ Михаил Ефимович Николаев 1996 с.тэрийбитэ, ол кэмҥэ аан бастаан киэҥ далааһыннаахтык ыытыллыбыта.
VIII «Азия оҕолоро» норуоттар икки ардыларынааҕы успуорт оонньууларын Уотун эстафетата быйыл кулун тутар 20 күнүгэр Хаҥалас улууһун Покровскай куоратыттан саҕаламмыта. Онно улуус баһылыга Иринеев Олег Валерьевич, спорт миниистирэ Спиридонов Леонид Николаевич, улуус спортсменнара кыттыыны ылбыттара. Олор истэригэр биһиги Качыкааппыт нэһилиэгиттэн төрүттээх биллэр тустуук Ефимов Владислав Дмитриевич кыттыбыта. Кини нэһилиэкпит киэн туттар спортсмена буолар.
Ефимов Владислав Дмитриевич — V «Азия оҕолоро» норуоттар икки ардыларынааҕы успуорт оонньууларын боруонса призера, Уһук Илин федеральнай уокурук ыччат спортивнай күрэҕин чемпиона, Россия устудьуоннарын икки ардыларыгар спортивнай күрэх, Саха сирин 2015, 2019 сыллааҕы чемпионаттарын кыайыылааҕа буолар. Билигин даҕаны тустуу, хапсаҕай күрэҕэр наар кыттар.
Мин эмиэ тустуу спордун сөбүлүүбүн. Оскуолабытыгар тустуу дьарыгар сылдьыбытым. Онно биһигини тренер Елисеев Сергей Иванович дьарыктаабыта. Кини үөрэнээччитэ Владислав Дмитриевич биһигини тустууга, хапсаҕайга эмиэ эрчийбитэ. Мин киниттэн ыйытыыга эппиэттииригэр көрдөстүм.
— Спордунан хаһыс кылаастан дьарыктаммыккыный?
— Спордунан 2002 сыллаахха 1 кылааска үөрэнэ сылдьан саҕалаабытым. Бастакы тренердэрим Елисеев Сергей Иванович, Лебедев Олег Дмитриевич, Каженкин Петр Михайлович этилэр. Кинилэр тустуу, хапсаҕай ньымаларыгар, сымса, сылбырҕа буоларга үөрэппиттэрэ. Онтон саҕалаан спордунан дьарыктанар буолбутум.
- «Азия оҕолоро» норуоттар икки ардыларынааҕы успуорт оонньууларыгар аан бастаан кыттыбыккын туһунан сэһэргиэҥ дуо?
- Мин 2012 сыллаахха V «Азия оҕолоро» норуоттар икки ардыларынааҕы успуорт оонньууларыгар аан бастаан кыттар чиэскэ тиксибитим. Онно кыттарбыттан наһаа үөрбүппүн өйдүүбүн. Киэҥ түһүлгэҕэ тахсан тустан, III миэстэ буолбутум. Наһаа үчүгэй күрэхтэһии буолан ааспыта.
- Оҕолорго тугу сүбэлиэҥ этэй?
- Оҕолор, куһаҕан дьаллыктары батыһымаҥ, бэрээдэктээх буолуҥ. Оччоҕо олоххутугар туруоруммут сыалгытын ситиһэн иһиэххит. Спордунан дьарыктаныҥ, чөл олоҕу тутуһуҥ.
Вадим Никифоров, VI кылаас,
«Үрүйэчээн» пресс-киин эдкора.
Кыһыл Үрүйэ оскуолата, Хаҥалас.