«Кыталыктаах кырдалым» диэн саҥа тахсар киинэ режиссера Михаил Лукачевскай биһиги оскуолабытыгар кэлэ сылдьыбыта.
VI, VII, VIII кылаас үөрэнээччилэриттэн турар фокус-бөлөххө анаан ситэ таҥыллан, оҥоһуллан бүтэ илик киинэтин көрдөрбүтэ. Ити кулун тутар 22 күнүгэр этэ. Биһиги бары кылааска мустан олорон, 1 чаас 20-чэ мүн. уһуннаах киинэни долгуйа, уйадыйа көрбүппүт. Киһи чуҥкуйар, өрө көтөҕүллэр ханнык түгэннэрэ баалларын, киинэ ис хоһоонун, геройдарын туһунан режиссеру кытта олорон кэпсэппиппит.
Үлэбит манан эрэ түмүктэммэтэҕэ. Салгыы оҕолорбут күннээҕи олохторугар, тутта-хапта сылдьалларыгар, олоҕу көрүүлэригэр, тулалыыр эйгэни ылыныыларыгар туох уларыйыылар киирбиттэрин кэтээн көрбүппүт.
Оҕолорбут өй-санаа өттүнэн лаппа дириҥээбиттэр. Ол тылларыгар-өстөрүгэр, бэйэ-бэйэлэрин кытта кэпсэтэллэригэр биллэрдик көстөр. Киинэ хас биирдии түгэнигэр оҕолор бэйэлэрин булан көрбүттэр. «Элбэх ыйытыыга эппиэт буллубут, испитигэр туох чэпчэки баар буолла» дииллэр. Сулус тахсарын кэтэһэр, сулустары кытта кэпсэтэр оҕолор баар буолбуттар. Бу киинэ нөҥүө 13-14 саастаах оҕолорго саамай суолталаах, наадалаах – бэйэҕэ эргиллии, бэйэни иһиллэнии баар буолла. Чуумпуран олорон бэйэни иһиллэнии билиҥҥи олоххо уустук. Киһиэхэ эрэ барытыгар кыаллыбат. Бу киинэ ити өттүнэн олус күүстээх.
«Былыргы дьон буолан баран, наһаа да өйдөөхтөр, бырааттарыгар хаамар тренажер оҥорон биэрдилэр», – диэн дьэ улаханнык сөхпүттэр. «Валерий Ноев диэн кимий?» диэн элбэх оҕо ыйытар буолла. «Урут даҕаны «звезда» диэн баар эбит батта», – диэн соһуйаллар.
Бу киинэни кытта тэҥҥэ Валерий Ноев аата саҥа көлүөнэҕэ сонуннук, уратытык иһилиннэ.
Неругайканы наһаа сөбүлээбиттэр. Кинилэр «Неругайкалара» ким буоларын тута булбуттара. Үтүө санаалаах киһи буоларын билбэккэ сылдьарбыт буолуо диэн аһыннылар. Онно болҕомто уурбакка сылдьалларыттан бэйэлэрин буруйдаммыт оҕолор эмиэ көһүннүлэр.
Киинэ кэнниттэн «оо, фантазер да киһи эбиккин», «биир дьиэ кэргэн – биир сутурук», «Неругайка – мөҕүмэ» диэн тыллары туттар буоллулар.
Биир чаас 30 мүн. көрбүт киинэбит бэйэтэ туспа психологическай тренинг кэриэтэ буолла. Киһи өйүгэр-санаатыгар оннук чугас.
Дириэктэри иитэр үлэҕэ сүбэһиттэр, психологтар, социальнай педагогтар, учууталлар, кылаас салайааччылара, оҕо иитиитигэр интэриэстээх, бу хайысхаҕа бүгүн үлэлии-хамсыы сылдьар дьон уонна биллэн туран, төрөппүттэр «Кыталыктаах кырдалым» киинэттэн элбэҕи туһаныаххыт дии саныыбын.
Киинэбитин улахан экраҥҥа көрөөрү бары кэтэһэн олоробут.
Лидия Ивановна Лукина, дириэктэри иитэр үлэҕэ сүбэһит,
медиа киин салайааччыта, С.Д. Флегонтов аатынан Хадаар орто оскуолата, Чурапчы