Муус устар 13 күнүгэр Эмис нэһилиэгэр Н.С. Захаров-Сахаачча аатынан Амматааҕы оҕо спортивнай оскуолатын тренерэ, ССРС спордун маастарыгар кандидат, Саха өрөспүүбүлүкэтин үөрэҕириитин туйгуна Илья Анатольевич Солдатов сырдык кэриэһигэр улуустааҕы тустуу турнирыгар 80-ча эдэр бөҕөс 15 ыйааһыҥҥа кыттыыны ылла.
Илья Анатольевич дьиэ кэргэнэ, бииргэ төрөөбүттэрэ, чугас аймахтара Барашковтар, Николай Герасимович Новиков-III ыччаттара бары кыттыһан 26000 солк. бирииһи харчынан туруорбуттара. Бу бириис 15 ыйааһын чемпионнарыгар лотерянан оонньоммута. Бириис хаһаайынынан Алтан нэһилиэгин тустууга хамаандатын чилиэнэ, 2014-2015 с.т. уолаттарга 21 кг чемпиона, Алтан орто оскуолатын I кылааһын үөрэнээччитэ Айсиэн Николаев буолла. Эмис нэһилиэгин олохтоохторо «бэйэбит уолбутугар түбэстэ» диэн үөрүүлэрэ муҥура суох. Айсиэн эһээтэ Федор Васильевич, эбээтэ Галина Константиновна Неустроевтар төрүт Эмис олохтоохторо. Кинилэр кыыстара, Айсиэн ийэтэ Лариса Федоровна Алтаҥҥа Алексей Даниловичтыын Николаевтар диэн ыал буолан олороллор. Николаевтар спорду өрө тутар эдэр ыал. Айсиэн убайа Аман Николаев III кылаас үөрэнээччитэ. Тустууна дьарыктанар. Билигин Кабардино-Балкарскай өрөспүүбүлүкэ Нальчик куоратыгар сборга тиийэн, күүстээх эрчиллиини ааһа сылдьар.
Алтан нэһилиэгэр убайдыы-бырааттыы Николаевтар тренер Антуан Антуанович Харлампьев салалтатынан дьарыктаналлар.
Айсиэн Николаев илиитигэр харчынан бирииһи тутан олорон санаатын маннык суруйар:
Мин Илья Анатольевич аатынан турнирга бастакы миэстэ буолан мэтээл, кубок грамота, 5000 солк. харчы ылбытым. Лотереяҕа 26000 харчыны ыламмын үөрдүм. Өссө дьарыктаныам, күрэхтэһэ кэлиэм. Сүүйбүт харчыбынан Дагестаҥҥа дьарыктана барыам этэ. Махтал турнир ыыппыттарыгар, тренербар.
Айсиэн Николаев ыраах Дагестаҥҥа дьарыктана тиийэр ыра санаата туоллун. Кыайыылаах-хотуулаах, киэҥ соргулаах киһи киһитэ буола улаат, Айсиэн!
Сардаана МАТВЕЕВА
1
Айсиэн, кытаат. Ыра санаан туоллун.