Кулун тутар 28 күнүгэр Чурапчыга оҕолорго волейбол өрөспүүбүлүкэтээҕи күрэҕин үөрүүлээхтик арыйыы буолла. Бу ураты тыҥааһыннаах түһүлгэ. Тоҕо? «Спортивные Якутяне» үөрэнээччилэр өрөспүүбүлүкэтээҕи спартакиадаларыгар кыттарга бастыҥнары сүүмэрдиир.
Күрэхтэһии үөрүүлээх арыллыытыгар Чурапчы улууһун баһылыга Степан Анатольевич Саргыдаев, улуус депутаттарын сэбиэтин бэрэссэдээтэлэ Яков Павлович Оконешников, өрөспүүбүлүкэтээҕи спортивнай резервэни бэлэмниир киин дириэктэрин эбээһинэһин толорооччу Александр Николаевич Андреев, «Саха сирин кэнчээри ыччата» үөрэхтээһин тэрилтэтин спорт салаатын старшай методиһа Николай Николаевич Гуляев, бастакы категориялаах судьуйа, күрэх сүрүн судьуйата Анатолий Валерьевич Чемерзанскай, Саха өрөспүүбүлүкэтин волейболга федерациятын бэрэстэбиитэлэ Константин Михайлович Сидоров кыттыыны ыллылар, спортсменнары кынаттыыр эҕэрдэ тылларын эттилэр. Ол кэнниттэн «Кыталык» оҕо саадын иитиллээччилэрэ «Дьөһөгөй» үнкүүтүнэн эҕэрдэлээтилэр.
Күрэх арыллыытын кэмигэр улуус баһылыгын Степан Анатольевич Саргыдаевы көрсөн кэпсэттибит.
– Биһиги бүгүн хатыҥнаах-чараҥнаах хампа-солко алаастардаах, оттуун-мастыын нарын-намчы Чурапчыбыт сиригэр-уотугар оскуола оҕолоругар волейболга сүрдээх улахан түһүлгэни тэрийэн ыытар чиэскэ тигистибит. Онон түгэнинэн туһанан үөрэх, спорт министиэристибэлэригэр махталбын тиэрдиэхпин баҕарабын. Бу күрэххэ уопсайа кыргыттарга уонна уолаттарга 17 хамаанда үс күн устата «Спортивные Якутяне» үөрэнээччилэр сайыҥҥы спартакиадаларыгар путевканы ылар иһин киирсиэхтэрэ. Уопсайа 298 оҕо кыттыыны ыла кэллэ. Күрэх икки сааланан, А.И.Федотов аатынан МФСК-ҕа уонна А.К .Софронов аатынан КСК-ҕа, ыытыллыаҕа. Биллэн туран, бу барыта түмүллэн ыччаттарбыт ситиһиилээх, чэгиэн буолан тахсалларыгар олук буолар, – диэн улуус баһылыга Степан Анатольевич Саргыдаев санаатын үллэһиннэ.
Вадим КОЛЕСОВ, Х кылаас,
А.П. Илларионов аатынан Хайахсыт орто оскуолата, Чурапчы