Олунньу 26 күнүгэр, Таатта улууһун Уус Амма нэһилиэгэр Саха өрөспүүбүлүкэтин ситэриилээх былааһын 2023 сыллааҕы үлэтин отчуота буолан ааста. Отчуоттуур мунньаҕы Саха Өрөспүүбүлүкэтин бэрэссэдээтэлин солбуйааччы Сергей Васильевич Местников салайан кэллэ.
Нэһилиэк олохтоохторо спецтехника, уу таһар массыына хаһан көрүллэрин, нэһилиэккэ ититии ситимин биир өттүгэр тутуутун, быстах байыаннай дьайыыга сылдьар байыастар тустарынан, онно көмө, иһэр уу, халаан уута, арҕааҥы биэрэги бөҕөргөтүү үлэтэ, өттөөһүн, бэтэринэриийэ сулууспатын оҥорор өҥөтүн төлөбүрэ ханна барарын ыйыттылар.
Нэһилиэк сытыытык турар ыйытыыта Г.Д. Бястинов-Бэс Дьарааһын аатынан Чымынаайы орто оскуолатын тутуу буолла. Бу туһунан РСФСР үөрэҕириитин туйгуна, учууталлар учууталлара, оскуолабытыгар уһун сылларга дириэктэринэн үлэлээбит, Уус-Амма нэһилиэгин бочуоттаах олохтооҕо Олег Иннокентьевич Арылахов санаатын эттэ. Чымынаайы орто оскуолата хаарбах туруктаах буолан сабыллан, билигин түөрт сиринэн үөрэнэр-үлэлиир уустугун эттилэр, саҥа оскуола тутулла охсорун курдук туруорустулар.
Ону таһынан Саха Өрөспүүбүлүкэтин бэрэссэдээтэлин солбуйааччы Сергей Васильевич Местников «Сахаспецтранц» суоппарыгар Анатолий Гаврильевич Нестеревка, уһуйаан сэбиэдэссэйигэр Ньургустаана Николаевна Саввинаҕа Махтал сурук, химия уонна биология учууталыгар Петр Михайлович Кондратьевка бочуоттаах грамота туттарда.
Түмүккэ, нэһилиэк олохтоохторо өрөспүүбүлүкэ бырабыытылыстыбатын 2023 сыллаахха ыыппыт үлэтин сөптөөҕүнэн сыаналаатылар.
Василена Нестерова, 9 кылаас үөрэнээччитэ, Г.Д. Бястинов-Бэс Дьарааһын аатынан Чымнаайы орто оскуолата, Таатта улууһа