Бүгүн В.П. Ларионов аатынан физико-техническай лиссиэй VIII «А» кылааһа (салайааччы Мария Юрьевна Саввина) «Киэҥ эйгэҕэ сахалыы саҥарыы сатабыла» диэн В.П. Ларионовка уонна төрөөбүт тыл күнүгэр аналлаах араатардар күрэхтэрин иилээн-саҕалаан ыытар.
Тэрээһин сыалынан-соругунан сахалыы тыл-өс култууратын, сахалыы саҥарыы сатабылын үөрэнээччилэргэ иҥэрии, түмэр-салайар дьоҕурдарын сайыннарыы, төрөөбүт дойдуга бэриниилээх буолууга уһуйуу буолар.
Күрэх үс түһүмэхтээх: I түһүмэх: В.П. Ларионов туһунан иһитиннэрии. II түһүмэх: Бэриллибит тиэмэҕэ тыл этии. III түһүмэх: «Үрдүк үөрэхтээх эрэ киһи дойдутугар туһаны аҕалар…» тиэмэҕэ дебат. Түһүмэхтэринэн арааран, кыайыылаахтарга үс үрдэллээх Добун суруктары туттараллар. «Этигэн тыллаах этээччилэр», «Ыллыктаах тыллаах этээччилэр», «Итэҕэтиилээх тыллаах этээччилэр», «Кэскиллээх этээччилэр» анал ааттары иҥэрэллэр.
Мария Юрьевна Саввина салайааччылаах VIII «А» кылаас, төрөппүттэрин көмөлөрүнэн, Ларионов аатын үйэтитиигэ элбэх үлэни ыытар. Саха сирин чулуу учуонайа, сахаттан бастакы академическай билим доктора В.П.Ларионовка анаан өйдөбүнньүк муннугу арыйбыттара. Тупсаҕай көстүүлээх, уурбут-туппут курдук оҥоһуулаах витрина оҥортороору, кылаас дьаарбаҥка тэрийбитэ. Киирбит үп харчытынан витрина оҥоһуллан, сылын ахсын экспозицията уларыйа турар быыстапка үлэлиир.
Бастакы быыстапка В.Ларионов научнай үлэтэ, Саха сиригэр, Россияҕа өҥөтүн туһунан. Иккис быыстапкаҕа учуонай оҕо сааһа уонна устудьуоннаабыт сыллара киирдилэр. Кылаас оҕолоро бэйэлэрэ лиссиэй ыалдьыттарыгар, үөрэнээччилэргэ быыстапка туһунан сиһилии кэпсииллэр.
Кылааһынан В.Ларионов төрөөбүт дойдутугар Мэҥэ Хаҥалас Лоомтукатыгар тахса сылдьыбыттара. Олорбут дьиэтэ билигин мусуой буолан турар. Оскуола оҕолорун кытта билсэн, оонньоон, сэһэргэһэн, учуонайга анаммыт мусуойга сылдьан, саҥаны билэн, сэҥээрэн кэлбиттэрэ.
Дьокуускайга В.Ларионов төрүттээбит уонна өр сылларга салайбыт Физика-техническай кыһалҕалары быһаарар институкка экскурсияҕа сылдьыбыттара. Үгэскэ кубулуйбут сылын ахсын ыытыллар тэрээһин солбуллубат кыттыылаахтара буолаллар, В.П.Ларионов пааматынньыгар сибэкки дьөрбөтүн уураллар.
Биир ураты тэрээһининэн В.Ларионов төрөөбүтэ 85 сылыгар анаан, Винокурова Т.Е.-Сабыйа хоһоонун видео-ролик оҥорон киэҥ эйгэҕэ таһаардылар. Хоһоону оҕолор, төрөппүттэр, кылаас салайааччыта «Арчы” дьиэтигэр сахалыы таҥастаах аахпыттара олус кэрэхсэбиллээх.
Ларионов төрөппүт кыыһа Майя Владимировнаны кытта билсэн, ирэ-хоро кэпсэтэн, сэргэх кэпсэтии тахсыбыта.
Ларионовка аналлаах үлэни бүтүн кылаас бырайыага оҥостон, оҕолор араас куонкуруска, кэмпириэнсийэҕэ кыттан, Сахабыт сирин чулуу уолун аатын ааттата тураллар.
Соторутааҕыта Өрөспүүбүлүкэ чулуу дьонун аатын сүгэр оскуолалар Бүтүн өрөспүүбүлүкэтээҕи сүлүөттэригэр кыттан, 18 хамаандаттан 3-с миэстэ буолбуттара. Дьоруой туһунан, кинини үйэтитиигэ туох үлэ бара турарын билиһиннэрэн, видеоролик, визитка уонна быыстапка тэрийбиттэрэ. Манна «Геройга аналлаах чинчийэр-кыраайы үөрэтэр уонна научнай-поисковай быыстапка» хайысхаҕа 1 миэстэни ылар чиэскэ тиксибиттэрэ.