Буойун-учуутал, саха Маресьева Степан Кузьмич Макаров аатынан Чурапчы гимназиятыгар 30-с төгүлүн Тиһэх чуораан чугдаарда. Быйыл 11-с кылааһы 41 оҕо, 9-с кылааһы – 48 оҕо бүтэрэр.
Бүгүҥҥү тэрээһин олус астык буолла. Чурапчы улууһун баһылыгын бастакы солбуйааччыта Рустам Романович Данилов, Чурапчы үөрэҕин салалтатын начальнига Юрий Павлович Посельскай, Чурапчы нэһилиэгин баһылыга Владимир Дмитриевич Сивцев, С.К. Макаров аймах-билэ дьонун аатыттан «Бастакылар хамсааһыннарын» үлэһитэ Любовь Семеновна Макарова үөрэнээччилэри эҕэрдэлээтилэр.
Үөрүүлээх быһыыга-майгыга Федор Кузьмич Попов аатынан «Сердце патриота» бэлиэни Андрей Степановка, Феликс Александрович Поморцев аатынан Юнармия мэтээлин Кира Кимҥа, Семен Андреевич Новгородов аатынан бириэмийэни Олег Макаровка, Степан Кузьмич Макаров аатынан стипендияны Анна Захароваҕа туттардылар. Чурапчы улууһун баһылыгын Махтал суругунан Айыына Васильева, Дайаана Рожина, Дайаана Барашкова, Анна Захарова, Ирина Шадрина, Инга Григорьева, Юлиана Саввина, Сандаара Неустроева наҕараадаланнылар.
Бу курдук, долгутуулаах түгэҥҥэ үөрэххэ, спорка, уопсастыбаннай үлэҕэ бастыҥ оҕолорбутун наҕараадалаатылар. Маны тэҥэ 2024-2025 үөрэх дьылын түмүгүнэн үгүс ситиһиилээх гимназистары «Гимназист года» анал аатынан чиэстээтилэр. Бүгүн эҕэрдэ тыл истиҥэ, этэр тыл кэрэтэ иһилиннэ. Оҕолору үөрэппит учууталлара, кылаастарын салайааччылара үөрэ-көтө эҕэрдэлээтилэр.
Выпускниктар уонна төрөппүттэр харда тыллара бука барыбытын долгутта. Кинилэр тапталлаах оскуолаларыгар, учууталларыгар истиҥник махтанан “Я люблю гимназию” арт-эбийиэги бэлэх ууннулар.
Ол кэнниттэн выпускниктар бары вальстаан дайдылар, «Быраһаай, оскуолам!» ырыаны истиҥник ыллаатылар, умнуллубат кэрэ түгэни бэлэхтээтилэр.
Мин выпускниктары “Аны 6 сылынан биһиги маннык турар буолабыт дуо?” диэн кэрэхсии көрдүм. Олохпутугар биир саамай долгутуулаах кэммит эмиэ үүнүөҕэ дии санааммын олус долгуйдум.
Оскуоланы бүтэрээри сылдьар доҕотторбутун истиҥник эҕэрдэлиибит. Улахан олоххо үктэнэр кэрэ бэлиэ күҥҥүт үүммүтүнэн тэҥҥэ долгуйабыт. Инникитин сүрэххитинэн талбыт идэҕитин баһылаан, киһи киһитэ, үлэһит үтүөтэ буола улаатыаххыт диэн эрэнэбит. Дьолу-соргуну, элбэх үөрүүлээх түгэннэри баҕарабын.
Айыына-Куо ПОПОВА, V кылаас, «Тумус кыһа» медиа киин,
С.К. Макаров аатынан Чурапчы гимназията