Бүтүн Арассыыйатааҕы “Океан” оҕо киинигэр XI сменаҕа “Юнармейские маршруты” кыраайы үөрэтэр, туристическай хайысхалаах лааҕырга Владивосток куоракка сайыммытын уһатан кэллибит.
Юра: — Бу лааҕырга сылдьарга бастатан туран, Бүтүн Россиятааҕы “Юнармия” хамсааһын чилиэнэ буолуохтааххын. Путевканы ыларга куонкурус ааһаҕын. Онно үс сыллааҕы байыаннай-спортивнай өттүнэн саамай улахан ситиһиилэргин грамоталары, сертификаттары, кыраайы үөрэтиигэ төрөөбүт дойдуҥ туһунан презентация оҥорон ыытаҕын. Ситиһиилэрбитигэр оскуолабыт иһинэн үлэлиир «Бэргэн» байыаннай-спортивнай кулуупка дьарыктанар буоламмыт күрэхтэһиилэргэ элбэх кыайыыларбытын, Бүтүн Россиятааҕы “Президентские состязания” кыттан айар күрэххэ 2 миэстэбитин уонна биирдиилээн ситиһиилэрбитин киллэрбиппит. Маны барытын түмэн баал тахсар, биһиги баалбыт үрдүк буолан хапсыбыппыт, куонкуруһу аастыгыт диэн сурук кэлбитигэр наһаа үөрбүппүт. Саха сириттэн биһиги үс эрэ хапсыбыт этибит.
Дайаана: — Атырдьах ыйын 30 күнүгэр Хабаровскай куоракка көппүппүт, онто Владивостокка диэри поеһынан айаннаан тиийбиппит. Үчүгэйдик айаннаан тиийбиппит. Владивостокка тиийбиппитигэр “Океан” лааҕыр баһаатайа көрсөн, анал автобуһунан барбыппыт. Лааҕырга тиийээппитин кытта дружиналарынан, этэрээттэринэн араарбыттара. Тиийбиппит үһүс күнүттэн построениелар буолан саҕаламмыттара. Смена аһыллыытыгар дружинабыт иһигэр Кыайыы 76 сылыгар анаан параадтаабыппыт. Улахан Кыайыы знамятын чиэстээхтик киллэрбиттэрэ. Сменабытын Юнармия Приморскай кыраайдааҕы регионнааҕы салаатын начальнига Михаил Любецкий салайан үлэлэппитэ. Үөрэхпитигэр күҥҥэ иккитэ НВП (основы начальной подготовки) диэн курс буолар этэ уонна өссө “Основы огневой и медицинской подготовки” диэн үөрэҕи ааспыппыт. Онно “Медицина”, “Основы туристической деятельности”, “Юный краевед”, “Огневая подготовка”, “Тактическая подготовка”, “Служу отечеству” диэн куурустары аармыйаҕа сулууспалыы сылдьар саллааттар, офицердар, дьиҥнээх сэриигэ сылдьыбыт байыаннайдар кэлэн кэпсээн, үөрэтэн бараллар этэ. Онно үөрэппиттэрин барытын холбоон, түмэн “Зарница” диэн байыаннай-спортивнай күрэх тэрийбиттэрэ. Онно Юралаах Артем талыллан кыттыбыттара, хамаанданан бастаабыттара.
Артём: — Бу лааҕырга баран кэлбиппиттэн олус астынабын. Саамай сөбүлээбитим — “Зарница” күрэхтэһиини уонна байыаннай бэлэмнэнии үөрэҕин (НВП). “Зарницаҕа” биир хамаандаҕа 10 оҕо кыттыбыта. Бастакы түһүмэх 5 киһи ОЗК кэтэр, 5 киһи противогаз, ол кэннэ аныгыскы түһүмэххэ диэри сүүрэн бараҕын. ОЗКны уонна противогазы усталлар, онтон массыына көлүөһэтин покрышкатын үрдүнэн сүүрэллэр, онтон хатыылаах борубулуоха курдук аннытынан сыыллан бараллар, ити кэнниттэн 4 киһи АК-74 ыһаллар-хомуйаллар, икки киһи автомат маҕаһыынын таҥаллар уонна 4 киһи кыра күрдьэҕи, гранатаны быраҕар, ол кэннэ 2 киһи улахан тыраахтар көлүөһэтин покрышкатын эргитэн быраҕан 20 миэтэрэ курдук ыраах турар сиргэ илдьэллэр, медицинскэй көмөнү оҥорууга эти-сиини тоһутууга шинаны уурарга ыйытыыларга эппиэттиигин. Онтон миинэлээх хонууга 2 киһи сапёр таҥаһын кэтэн металлоискателинэн миинэ булан флажок уурар, онтон кошканан растяжканы тардан миинэны эспитэ. Бүтэһиккэ сыал ытыыта буолбута. Хамаанданан кыттар буолан,түһүмэхтэри үллэстибиппит, уопсай түмүккэ биһиги хамаандабыт кыайыылаах буолан, грамотанан, мэтээлинэн наҕараадаламмыппыт. “Океан” лааҕыр территорията олус киэҥ, биһиги “Китенок” диэн дружина этибит. Үстүү-түөртүү буолан кыра кубик дьиэлэргэ олорбуппут. Аһыыр, суунар, үөрэнэр сирбит барыта тус-туспа тэйиччи тураллар. Дьарыкпыт, күрэхтэһиилэрбит наар таһырдьа буолар, ыытыллар этилэр, муора салгынын олус сөбүлээтим, сылаас буолан, сайыммыт уһаабыт курдуга. Учууталбытыгар Ирина Юрьевнаҕа уонна Иван Евсеевичка, төрөппүттэрбитигэр махталбытын тиэрдэбит.
Артем ИМ, 11б кылаас, Дайаана ГУЛЯЕВА, Юра ПРУДЕЦКАЙ, 9-б кылаас,
“Бэргэн” байыаннай-спортивнай кулууп иитиллээччилэрэ.