Ийэ тыл уонна сурук-бичик күнүгэр Маар орто оскуолатын «Юла» медиакиинэ таһаарбыт «Биллим» остуол оонньуутун уһуйаан оҕолоругар билиһиннэрдилэр.
«Биллим» остуол оонньуута кыра оҕолорго сахалыы тэриллэри ааттыы үөрэнэргэ, тыл саппааһын байытыы, толкуйдуур дьоҕуру сайыннарыы сыаллаах оҥоһуллан тахсыбыта.
Алина Антонова, «Юла» медиакиин юнкора:
— Бу күн кырачаан оҕолорго С.А. Новгородов алпаабытын билиһиннэрдибит. Оҕолор омуктуу буукубаларга майгынныыр диэн бэлиэтии көрдүлэр. Ханнык сахалыы остуоруйалары билэллэрин иһиттибит, Анялыын сахалыы остуоруйа аахтыбыт.
Аня Ноева, оскуола актыбыыһа:
— Уһуйаан оҕолоругар остуолбут оонньуута ыарахан эбит диэн санааҕа кэллим. Ол гынан баран төһөнөн элбэхтэ оҕо оонньуур, оччонон сахалыы тэрил, мал-сал ааттарын билэр буолар буоллаҕа.
Түмүккэ биһиги кырачааннарга «Биллим» остуол оонньуутун бэлэх ууннубут.
«Юла» медиакиин, Маар орто оскуолата, Ньурба.
keskil14.ru