Кыайыы күнэ төһө да ааспытын иһин, күннээҕи олохпутугар суолтата сүппэт, мөлтөөбөт дии саныыбын. Биһиги бэтэрээннэрбитин, сэрии дьоруойдарын билиэхтээхпит, кинилэр ааттарыгар сүгүрүйүөхтээхпит.
Ол курдук, ыам ыйын 8 күнүгэр биһиги кылаас үлэ уонна тыыл бэтэрээнин Андреева Варвара Николаевнаны эҕэрдэлээтибит. Кини Горнай улууһун Маҕарас нэһилиэгин олохтооҕо, 87-с хаарыгар үктэнэн олорор. Элбэх оҕо, сиэн, хос сиэн амарах ийэтэ, эбэтэ, хос эбэтэ буолар.
Кылаас аатыттан төрдүө буолан учууталбытынаан Раиса Егоровналыын сырыттыбыт. Варвара Николаевна оҕо сааһа ыарахан сэрии сылларыгар ааспытын, кыра сааһыттан үлэҕэ эриллибитин кэпсээтэ.
Онтон биһиги кинини үөрдэн ырыа ыллаатыбыт, хоһоон эттибит, хомуска оонньоотубут, ас арааһын туттардыбыт. Куоракка айанныырбытыгар, ытык кырдьаҕас, алгыс тыллаах, сүөгэй кэһиилээх атаарда.
Амелия Андреева,
1 «в» кылаас,
Дьокуускай 6 нүөмэрдээх оскуолата