Бу сайын Муома улууһун Улахан Чыыстай нэһилиэгэр «Магир» тыа хаһаайыстыбатын производственнай дьиэ кэргэнинэн көһө сылдьар община иһинэн «Оралчимна» лааҕыр үлэлээбитэ. Күһүн саҥа үөрэх дьыла саҕаланан оҕолор дьиэлэригэр көһөн барбыттара.
Таба ыстаадатыттан нэһилиэккэ диэри сырыы суох. Онтон бу билигин быыбар үгэнэ буолан, балаҕан ыйын 10 күнүгэр ыстаадаҕа вертолет кэлэн барда. Ол туһунан лааҕыр салайааччыта, «МАГИР» община бэрэссэдээтэлэ, удьуор табаһыт Екатерина Егоровна Дьячкова кэпсиир:
— Балаҕан ыйын 10 күнүгэр биһиги ыстаадабытыгар быыбар вертолёта кэлэн барда. Дьиҥэ, вертолет 8 чыыһылаҕа кэлиэхтээх этэ. Халлааммыт хаардаан икки күн кэтэһиннэрдэ. Дьэ, уонна маннык сырыы таҕыстаҕына, саамай үөрүүлээҕэ — кэтэһиилээх кэһиилэрбитин тутабыт. Ол курдук, бэйэбит оҕолорбутуттан, ону тэҥэ бу сайын лааҕырга сайылаабыт оҕолортон кэһии туттубут.
Рома Слепцов быйыл оскуоланы бүтэрэн Хаандыгаҕа үөрэххэ киирбитэ. Рома үөрэҕэр барыан иннинэ, баһыылка бэлэмнээн хаалларбытын дьоно ыыппыттар. Кини биһиэхэ 4 сыл сайылаата, лааҕыр тутаах киһитэ. Айаалбытыттан эмиэ кэһии туттубут. Кини ийэтэ төрдө Чурапчы, онон дьэдьэн барыанньатын ыыппыт. Хоту дойду дьоно дьэдьэни саҥа амсайдыбыт, минньигэһэ сүрдээх. Айаал ыстаадаҕа быйыл саҥа кэлбитэ, кини 7 кылааска үөрэнэр. Витябыт эриллибит тэллэйтэн паштет оҥорон ыыппыт, наһаа минньигэс, сонун ас.
Онон лааҕырбыт оҕолоро эриэккэс минньигэс кэһии ыытан олус долгуйдубут, наһаа үөрдүбүт. Лааҕырга оҕо сылдьан сайылаабыт оҕолорбут, билигин номнуо үлэһит дьон, ыстаадаҕа наадалаах тэриллэри булан эмиэ ыыталлар.
Ити курдук оҕолорбут биһигини үтүөтүк саныылларыттан истиҥник үөрэбит уонна махтанабыт.
Сайын буолла даҕаны, хоту дойду оҕолоро ыстаадаҕа тиэтэйэллэр. Ыраас көй салгыҥҥа, айылҕаҕа көҥүллүк тыына сылдьартан улахан дьол диэн суох. Онон эһиилги сайыҥҥа диэри дии хаалаллар удьуор табаһыттар Дьячковтар дьиэ кэргэттэрэ. Кинилэр билигин, сибээс хаппат сиригэр, табаларын күөйэн көстүлэр.
Суруйда Анна СЛЕПЦОВА.