Бэҕэһээ, муус устар 22 күнүгэр, Кустуур орто оскуолатын үөрэнээччилэрэ, барыта аҕыс оҕо, «Кочевник-1» ыстаадаҕа сайылыы бардылар. Сылын аайы ыстаадаҕа сайылыы барар оҕо ахсаана элбээн иһэр. Быйыл 4, 5, 7, 8 кылаастартан аҕыс уол ыстаадаҕа үлэлии, сайылыы таҕыста. Ыстаадаҕа уолаттар таба иитиитигэр сыстыахтара, үөрэниэхтэрэ.
Ону таһынан быйыл аан бастакытын көс оскуола үөрэнээччилэрэ патриотическай хабааннаах Кыайыы дьыктаанын суруйуохтара. Манна оскуолабыт дириэктэрэ Матрена Алексеевна Горохова бэйэтинэн барда. Бу маннык тэрээһин Арктика сиригэр, ыстаадаҕа, бастакы үтүө холобур буолар.
Ыстаадаҕа оҕоҕо олус үчүгэй уонна туһалаах: айылҕаҕа хайдах сылдьарга, сиэри-туому тутуһарга, табаны хайдах көрөргө үөрэнэр. Оҕолор муус устар ыйтан саҕалаан күһүҥҥэ диэри ыстаадаҕа сыталлар. Хас да күн буола-буола ыстаада атын сиргэ көһөр. Оҕолор араас кэрэ сирдэри көрөллөр, билэллэр.
Уолаттарбыт ыстаадаҕа билиилэрэ кэҥээн, үлэҕэ сыстаҕас, ыарахантан чаҕыйбат, дьиҥнээх «олох оскуолатын» ааһан, айылҕаны кытары биир ситимнээх эргиллиэхтэрэ.
Стас ПОПОВ,
Кустуур орто оскуолатын 8 кылааһын үөрэнээччитэ, «Биракчаан» медиа-киин эдкора.
Кэскил14.ру