Ойуур баһаардарын бохсууга үлэлиир Уопсастыбаннай добровольческай ыстаап күн-түүн үлэлиир, баҕалаах эр дьону баһаар умулларыытыгар ыытар. Бэҕэһээ ВДВ күнэ бэлиэтэммитинэн сибээстээн, күөх береттээх уонна тельняшкалаах эр дьон хара сарсыардаттан ыстаапка кэлэн бэйэлэрин кылааттарын киллэрэн, бородууктанан көмө оҥордулар. Маны таһынан сорох десантниктар ойуур баһаарын умулларыытыгар Кэбээйи улууһугар барарга суруттардылар.
Баҕа санаатынан кэлбит хас биирдии байыаһы бэтэрээн өрүһүйээччи Василий Пуляевскай уоттан сэрэхтээх буолууга, харыстанарга үөрэтэр.
Ыстаапка баҕа санааларынан эр дьон эрэ буолбакка, дьахталлар эмиэ өрүүтүн кэлэллэр. Ол курдук бочуоттаах сынньалаҥҥа олорор Юлия Александровна Суханова бородуукта аҕалан көмөлөстө. Биллэр уопсастыбынньыктар: дьокутаат Елена Голомарева, быраас Ульяна Саввинова, адаптивнай спорт актыбыыһа Мария Горохова бэйэлэрин сэмэй кылааттарын эмиэ киллэрдилэр.
Аны Дьокуускай куоракка олорор биир дойдулаахтар түмсүүлэриттэн аан маҥнайгынан Кэбээйи улууһун түмсүүтэ баалларын биллэрдилэр. Ол туһунан түмсүү салайааччыта Руслан Михайлов кэпсиир:
— Атырдьах ыйын 1 күнүгэр биһиги куораттан бэйэбит биир дойдулаахтарбытын мунньан: 7 киһини — Сангаарга, 4 киһини — Сииттэҕэ, 8 киһини — Кэбээйигэ ыыттыбыт. Аны бүгүн өссө биир улахан састаап 40 киһилээх халыҥ аармыйа баһаар умулларыытыгар барыахтаах. Бу дьон истэригэр биһиги биир дойдулаахтарбыт эрэ буолбакка, атын оройуонтан төрүттээх дьон эмиэ бааллар. «Якутлесресурс» баһаарга сылдьар байыастарга харчынан төлөбүр төлүүр, ол аата нэдиэлэҕэ байыастар 16 тыһ. курдук хамнастаналлар, онтон штаб аһынан-таҥаһынан, туттар тэрилинэн хааччыйар.
Кэбээйи, Үөһээ Бүлүү, Ньурба курдук ыраах улуустарга баһаары бохсууга эр дьон наадалар диэн уопсастыбанньыктар көрдөһөллөр.
Билсэр нүөмэрдэргит: 8914824-75-06, 508-892, 508-893.
Аадырыстара: Орджоникидзе уул. 10.
Анна СЛЕПЦОВА.