Yөhээ Бүлүү улууhун Дүллүкү орто оскуолата байыанай-патриотическай хайысханы тутуhан үлэлиир. Сыллата тустаах үөрэх биридимиэтэ оҕолорго интэриэhинэй, туhалаах буоллун диэн көрдөрөр-үөрэтэр матырыйаалын хаҥатарга дьулуhар.Бу күннэргэ оскуолабытыгар БТР-80 бронетранспортер байыаннай тиэхиньикэни аҕалан туруордулар.
Бу модун тиэхиньикэ туох сыаллаах-соруктаах кэлбитин билээри, учууталбыт, «Десантник» парашют кулуубун салайааччыта Николаев Владимир Николаевиһы уонна байыаннай үөрэхтээhин учуутала Руфов Радомир Алексеевиhы кытта көрсөн кэпсэттибит. 
Владимир Николаевич, СӨ үөрэҕириитин туйгуна, «Yлэҕэ килбиэнин иhин» мэтээл хаhаайына, «Саха-Азия оҕолоро» пуонда стипендиата, ССРС үс төгүллээх Геройа, авиация маршала А.И.Покрышкин аатынан бэлиэ хаhаайына, подполковник:
— Бу — дьиҥнээх БТР. Улуус баhылыга Поскачин Владимир Семёнович уонна үөрэх управлениетын начальнига Борбуев Спиридон Олегович көмөлөрүнэн биһиги оскуолабытыгар ананан кэллэ. Биhиги байыаннай үөрэхтээhини дириҥэтэн үөрэтэр оскуолабыт уонна өрөспүүбүлүкэҕэ соҕотох парашютнай кулууптаахпыт, ол иhин биһиэхэ анаатылар. Биhиги сыалбыт-сорукпут — уолаттарга байыаннай тиэхиньикэни үөрэтии. Аны саас, сайын БТР-ы ыыттара үөрэтиэхпит. Полосаҕа турар эргэ мас БТР — бытын атын сиргэ көhөрүөхпүт уонна бу дьиҥнээх БТР-ы онно туруоруохпут.
1978 сыллаахха Дүллүкү оскуолатыгар үлэлии кэлиэхпиттэн байыаннай үөрэхтээhини саҕалаабытым. Бу тиэхиньикэни туруорса сатаабыппыт үс сыл буолла. Бастаан макет курдук да буоллун диэбиппит, онтон аны дьиҥнээх сүүрэ сылдьар байыаннай тиэхиньикэ буолла! Ис туруга барыта үчүгэй. Аны саас кыратык көрүнүллүөхтээх. Бу БТР-ы СОБР-дар илдьэ сылдьыбытын эргэрбит. Үөрэх тиэхиньикэтин курдук туттуллуоҕа.
Радомир Алексеевич, байыаннай үөрэхтээhин учуутала:
— Саҥа кэлбит байыаннай тиэхиньикэни аны саас полевой сборга туттуохпут. НВП уруогар күhүн уонна саас марш-бросокка туhаныахпыт, уруокка макет курдук туттан үөрэтиэхпит. Сайын байыаннай лааҕыр аhыллара эбитэ буоллар, ордук көдьүүстээх буолуо этэ.
Оскуолабытыгар байыаннай үөрэхтээhиҥҥэ сүрүн үлэ уолаттары Россия аармыйатын кэккэтигэр сулууспалыырга бэлэмнииргэ туhуланар. 8-с кылаастан саҕалаан бу бэридимиэти үөрэтэллэр, онтон 10-11 кылааска курсаннар буолаллар.
Саҥа тиэхиньикэни көрдүлэр-иhиттилэр, хаартыскаҕа түhэрдилэр «Эрчим» эдкорпост чилиэннэрэ Петя Семенов, Уруйдаана Афанасьева, Дайаана Федорова, Урсун Николаев, Моника Егорова.