Волонтер буолан Владивостокка

Владимир Горохов кыра эрдэҕиттэн үтүө санаалаах, тыынар тыыннаахха харысхаллаах, эйэҕэс, сылаас сыһыаннаах. Кини баҕа өттүнэн үтүөнү оҥорор дьон кэккэтигэр киирэр волонтер.

Кырачаан Вова төрөппүттэрин кытары “Көрдөөх стартары” инбэлиит оҕолорго оҥороро, көҕүлүүрэ. Эбэтэр, аһымал санаа кэнсиэртэригэр скрипкаҕа оонньоон, сэргэхситэрэ. “Волонтердар диэн —интэриэһинэй, дэгиттэр дьоҕурдаах дьон. Сорох дьон кинилэри өйдөөмүөхтэрин сөп. Волонтер диэн босхо көмөҕө мэлдьи кэлэр дьон. Кинилэр өҥөлөрүн сүрдээх хаачыстыбалаахтык толороллор уонна дьон иннигэр эппиэтинэһи сүгэллэрин өйдүүллэр. Ол иһин мин волонтер буоларбын сөбүлүүбүн уонна киэн туттабын”, — диир Владимир Горохов, Дьокуускай куораттааҕы лиссиэйи быйыл бүтэрээччи, Уһук Илиннээҕи федеральнай университет лингвистикаҕа хайысхатын устудьуона.

Быйыл нуучча, омук тылларыгар 98 бааллаах буолан, ангылычаан уонна кытай тылын үөрэтэр “Межкультурная коммуникация” салааҕа эрэллээхтик киирдэ. Владимир «Будущий дипломат” куонкурус 2022 с. III истиэпэннээх дипломана, омук тылын олимпиадаларын быйылгы кыайыылааҕа, СӨ Ил Дарханын 10 бастыҥ стипендиаттарыттан биирдэстэрэ. Казахстаҥҥа, Африкаҕа, Японияҕа, о.д.а. дойдуларга үөрэммитэ, сынньаммыта. Быйыл сайын Владивостокка “Азия оҕолоро” VII Оонньууларга Уһук Илиҥҥи Федеральнай уокурук волонтер-атташетын быһыытынан үлэлээбитин кэпсиир:

— Олунньуга волонтердар штабтарыгар сүүмэрдээһин буоларын билбитим. Приморскай кыраай тэбэр сүрэҕэр — Владивостокка оҕо саас уонна спорт улахан бырааһынньыга буолар диэни истэн, холонон көрөргө быһаарыммытым. От ыйыгар Владивосток сарсыардааҥҥы ардаҕынан, сылаас тыалынан илгийэ, хостел сырдык, үтүө эйгэтинэн иилии кууспута. Сол күн волонтердар бөлөхпүт куорат устун экскурсияҕа барбыппыт. Эгершельд маякка бастаан тохтоон ааспыппытын астыммытым. Маякка тиэрдэр суол синньигэс, таастардаах ыллык, кытыыларынан Петр Великэй хомотуттан уу курулуу охсуллар (Японскай муора сорох өттө). Экскурсовод кураанах өттүнэн сүүрүүнэн барарга эппитэ. Таастар устун түргэнник сүүрэн иһэн, тыыннаахпын үчүгэйдик өйдөөбүтүм. Долгун ыһыллара, ардах, сирэйгэр муораттан үрэр тыал — Приморье тыынын чаҕылхайдык биэрбитэ, муоранан устааччылары өйдөппүтэ. Салгыы Владивосток куорат тимир суолга вокзалын көрдүбүт. Бэрт чугастан поезтары буолбакка… устар, таһаҕастары тиэйэр суднолары көрдүбүт. Холобур, Соҕуруу Кэриэйэттэн кэлбит улахан судно баара. Онтон “Орлиное гнездо” смотровой площадкаттан Владивостогу үрдүктэн көрбүппүт. Салгыы Мариинскай тыйаатыр Приморьетааҕы сценатыттан 2000 солкуобай купюраҕа баар Көмүс далаһаны, Россия императора Николай II Александрович кэлэригэр анаан тутуллубут триумфальнай ааннары көрдүбүт.
Ити курдук, Владивостогу көрөөт, “Азия оҕолоро” Оонньууларга волонтер быһыытынан үлэлииргэ кынаттаммыппыт. Сорохтор протокольнай хамыыһыйаҕа, билетнэй программаҕа, норуоттар икки ардыларынааҕы пресс-кииҥҥэ, Кневичи аэропорка дьону көрсүүгэ, атаарыыга, о.д.а. спортивнай тутууларга үлэлээтибит. Мин спортивнай делегациялары кытары үлэлэстим. Уһук Илин Федеральнай уокурук самбоҕа хамаандатын мэлдьи арыаллаатым. Самбо күрэхтэһиитэ “Фетисов Арена” комплекска буолбута. Оонньуу түмүгүнэн делегациям оҕолоро икки боруонса мэтээли ылбыттара. Саха сирин спортсменнарыгар биһиги ыалдьан бөҕө!!! Мас-рестлинг, мини-футбол күрэхтэһиилэригэр биир дойдулаахтарбытын өйөөн бөҕө. Түмүктүүр оонньуу кэнниттэн мини-футболга Саха сирин сүүмэрдэммит хамаандатын сүрүн тренерэ Олег Марченко “ыалдьааччыларга” махталын биллэрбит суруйуу тахсыбыта. Оонньуулары олус астынным, биһигини, волонтердары салайан сылдьыбыт Евгений Амбросьевка ис сүрэхпиттэн махтанабын. Аан дойду араас муннугуттан кэлбит доҕоттор, көрдөөх түгэннэр, мичээр, үөрүү — мин Оонньууларым “Азия оҕолоро”!

Оонньуулар чаҕылхай түгэннэриттэн

Владимир Горохов устуутугар уонна таҥыытыгар “Азия оҕолоро” Оонньуу чаҕылхай түгэннэрин көрүҥ: Владивостокка көтүү, куораты аан маҥнай билсии, мас-рестлиҥҥэ уонна мини-футболга Саха сирин сүүмэрдэммит хамаандатын түмүктүүр уонна финал иннинээҕи киирсиилэрэ, Оонньуулары үөрүүлээхтик сабыы, бырааһынньыктааҕы дьэрэкээн фейерверк!

Бэлэмнээтэ Жанна Леонтьева.