Кэнчээри ыччат төрөөбүт сирин историятын, сайдыыны салайсыбыт ытык дьонун билэр, көлүөнэттэн көлүөнэҕэ тиэрдэр дириҥ толкуйдаах дьон буола улаатыыта норуот уһун үйэлэниитин оҥкула буолар.
В. П. Ларионов аатынан Майа орто оскуолатыгар муус устар 26 күнүгэр Саха АССР төрүттэммитэ 100 сылын бэлиэтиир дириҥ ис хоһоонноох тэрээһин ыытылынна.
Үөрэх күнэ сахалыы арчыланыы сиэриттэн-туомуттан саҕаланна. Саха тылын учууталлара кытыан ыраастыыр сытын таһааран, алгыстаах алаадьынан учууталлары, үөрэнээччилэри арчылаатылар. Бу күн учууталлар, үөрэнээччилэр бары сахалыы таҥнан кэллилэр. Оскуола радиоузелынан Саха АССР төрүттэниитин сырдатар биэрии үлэлэлээтэ, Саха сирин сардаҥалаах сарсыҥҥытын туһунан хомоҕой хоһоон, ылбаҕай ырыа дуораһыйда.
Үөрэнээччилэргэ эдэр автономнай өрөспүүбүлүкэ норуотун хаһаайыстыбата сайдыытын бастакы былааннарын уонна бырайыактарын ырытан оҥорууга төлөннөөх көҕүлээччилэринэн уонна тэрийээччилэринэн саха норуотун уһулуччулаах уолаттара, автономнай өрөспүүбүлүкэ бастакы салайааччылара – Максим Аммосов, Былатыан Ойуунускай, Исидор Барахов буолалларын сырдатар уруоктар, кылаас чаастара ыытылыннылар.
Бэлиэ күн сүрүн чааһынан сахалыы ырыалаах, оһуохайдаах, оһуор кэрэ үҥкүүлээх линиэйкэ буолла. Оскуола дириэктэрэ Светлана Игнатьева үөрэнээччилэр төрөөбүт дойдуларыгар бэриниилээх, уруккуну убаастыыр, сарсыҥҥыны салайсар дьоһун дьон буола улааталларыгар баҕа санаатын тиэртэ. Лидия Артемьева, Никандр Борисов салайааччылардаах «Тускул» үҥкүү ансаабыла эҕэрдэ үҥкүүтүн бэлэх уунна. Светлана Борисова,
Раиса Скрябина салайааччылаах үөрэнээччилэр холбоһук хуордара Саха сирин гиимнин толордулар. Светлана Бугаева салайааччылаах хоһоонньуттар төрөөбүт дойду туһунан дьүһүйүүнэн эҕэрдэлээтилэр. Валентина Кривошапкина, Ульяна Ефремова салайааччылаах 7 кылаас кыргыттара кылыһахтаах тойугу, хомус алыптаах дорҕоонун бэлэх ууннулар.
Бу курдук, кэнчээри ыччат норуот олоҕун историятын, Саха АССР төрүттэнниитин ситиспит чулуу дьоммут туһунан үгүһү биллилэр, өйдөрүгэр-санааларыгар киллэрэн сахалыы тыыны иҥэриннилэр.
Изабелла Романова