СР уус-уран гимнастикатын федерациятын уонна үҥкүү спордун түмсүүтүн салайааччыта Людмила Николаева бу күннэргэ Кемерово куораттан «Азия оҕолоро» иккис аан дойдутааҕы спортивнай оонньууларыгар бочуоттаах ыалдьыт быһыытынан сырытта.
Кини аатырбыт олимпиецтары Павел Пинигины, Георгий Балакшины, СР физическай культураҕа уонна спортка миниистирэ Леонид Спиридоновы уонна СР Государственнай мунньаҕын Ил Түмэн депутата Михаил Гуляевы кытары республика сүүмэрдэммит хамаандатын кытта көрүстэ, оҕолорго үтүө тыллары эттэ, ситиһиини баҕарда.
Кемерово уобалаһыгар уус-уран гимнастиканы уонна спортивнай үҥкүүнү сайыннарар дьону кытта көрсүһүүлэр буоллулар. Ол курдук, Людмила Николаева уус-уран гимнастикаҕа Кузбасс федерациятын салайар Сергей Бирюкову уонна кини кэргэнэ, Кузбасс сүүмэрдэммит хамаандатын салайар, Россия үтүөлээх тренерэ Ирина Бирюкованы кытта кинилэр спортивнай оскуолаларыгар сырытта, билигин Россия чемпионатыгар бэлэмнэнэр хамаанданы көрдө. Бирюковтар ааспыт сыллаахха Россия чемпионатыгар Саха өрөспүүбүлүкэтин кыргыттара чаҕылхайдык кыттыбыттарын уонна үчүгэй өйдөбүлү хаалларбыттарын бэлиэтээтилэр. Людмила Николаева Кемерово хамаандатын эһиил Саха сиригэр буолар «Азия оҕолоро» VIII сайыҥҥы оонньууларыгар ыҥырда.
Кемерово уонна Саха сирэ хамаандалара бэйэ-бэйэлэрин кытта уопут атастаһа хардарыта күрэхтэһиилэргэ сылдьарга сүбэлэстилэр.
Маны таһынан Кемерово уобалаһын спортивнай үҥкүүгэ федерациятын президенэ Руслан Рогожкины кытта көрсүһүүү буолла. Кузбасска уонна Саха сиригэр спортивнай үҥкүү сайдыытыгар баар уустуктар маарыннаһар, чугас эбиттэр диэн түмүккэ кэллилэр. Руслан Рогожкин Саха сиригэр бальнай үҥкүүнү саҕалаабыт Михаил Сивцевы кытта билсэр, доҕордуу сыһыаннааҕын уонна өрдөөҕүтэ Саха сиригэр бара сылдьыбытын кэпсээбитэ соһуччу үөрүүлээх буолла. Людмила Николаева эһиилги «Азия оҕолоро» оонньууга спортивнай үҥкүүгэ күрэхтэһии киирбитин биллэрдэ уонна Кузбасс хамаандатын онно кыттыыны ыларыгар ыҥырда.
Бу көрсүһүүлэр кэнниттэн Людмила Николаева «Азия оҕолоро» оонньуу уотун эстафетатыгар кыттыыны ылла. Кини факелы кытта Кемерово куорат киин уулууссатынан эстафета биир кэрчигэр сүүрдэ уонна ол кэнниттэн санаатын үллэһиннэ: «Эстафетаҕа сүүрэр наһаа долгутуулаах уонна эппиэттээх. Маннык чиэскэ тиксибиппиттэн сүрдээҕин үөрэбин уонна эстафетаны тэрийээччилэргэ махтанабын! Оонньуу үөрүүлээх арыыллыытын кэмигэр стадион үрдүнэн «Азия оҕолорун» гимнын «Кэнчээри» ансамбль ырыаһыт оҕолоро сахалыы ыллаабыттарыгар сүрдээҕин долгуйдум уонна 1996 сылтан Сахабыт сиригэр саҕаламмыт спортивнай оонньуу билигин дьоһун бренд буолан, салгыы атын куоратынан, дойдунан тэлэһийэн-тарҕанан, далааһыннанан иһэриттэн киэн тутуннум».
Людмила Николаева Кемерово куоракка эрэ буолбакка, уобаласка барытыгар спорт күүскэ сайдыбытын, баараҕай уонна кыахтаах спорт объектара элбэх сиргэ баарын бэлиэтээтэ, ону күрэхтэһии бүтүн 4 ч. куоракка тэҥинэн ыытылларын туоһулуур диэн эттэ.
ЯСИА хаартыскалара.
keskil14.ru