Усуйаана улууһун Хаһааччыйа орто оскуолатын оҕолоро сааскы сынньалаҥ кэмигэр бириэмэни бараабакка, туһалаах дьыаланан дьарыктаммыттарын туһунан иитэр үлэҕэ дириэктэри солбуйааччы Розалия Николаевна Горохова кэпсээтэ.
Хаһааччыйа оскуолатын оҕолоро дойдуга коронавирус карантина буолан, ыраах ханна да айаннаабатылар. Оннооҕор улуустааҕы «Сааскы таммахтар» уус- уран оҕо фестивала, улуу Кыайыы 75 сылыгар аналлаах араас тэрээһиннэр быстах кэмҥэ эмиэ тохтоотулар.
Ол эрээри дистанционнай ньыманан үлэ бара турар. Холобур, алын кылаас оҕолоругар уруһуй уонна таайбараҥ күрэхтэһиитэ, орто сүһүөх кылаастарга быраап тиэмэтигэр биктэриинэ, үрдүкү кылаас үөрэнээччилэригэр үс түһүмэхтээх интеллектуальнай оонньуу буолан ааста. Маны барытын педагог- организатор, РДШ тьютора Я.К.Бурнашева иилээн- саҕалаан ыытар.
Онтон оскуола учууталлара дистанционнай үөрэҕи саҕалыырга анаан, бары анал үөрэҕи аастылар. Билигин үөрэх барылын саҥаттан көрөн тупсараллар, видеоуруоктары бэлэмнииллэр. Быйылгы үөрэх дьылыгар биһиги оскуолабыт карантина суох этэҥҥэ үс чиэппэри толору үлэлээбит буолан, билигин төрдүс чиэппэргэ үксүгэр хатылааһын, барбыт тиэмэни чиҥэтии үлэтэ хаалан турар. Дистанционнай үөрэҕи саҕалыырга учууталлар бэлэмнэр.
Ол эрээри, саамай ыарахана, кыһалҕата диэн — сорох элбэх оҕолоох, аҕыйах дохуоттаах ыалга Интернет, көмпүүтэр, ноутбук суох. Оҕолор үксүлэрэ төлөпүөнүнэн эрэ сибээстэһэр кыахтаахтар. Ол иһин араас оонньуулар, күрэхтэһиилэр төлөпүөнүнэн буоллулар.
Маны таһынан, Хаһааччыйа нэһилиэгэр буола турар аһымал ааксыйа туһунан бэлиэтээн ааһыа этибит. Ол курдук, бу күннэргэ эдэр ыччат лидера Дмитриев Николай салайааччылаах волонтердар этэрээттэрэ аҕа саастаах дьоҥҥо маасканы тигэн түҥэттилэр. Эбии үөрэхтээһин педагога Ю. К Семенова , СДК «Сайдыы» дириэктэрэ Л.К. Барабанская, СДК методиһа В.А.Кладкина, соцпедагог, төрөппүт комитетын чилиэнэ, администрация сүрүн үлэһитэ, уо.д.а. эдэркээн ийэлэр түмсэн, туһалаах дьыаланы оҥордулар. Бу үлэҕэ сүрүн спонсорынан М. А.Аметова , В. А.Милютина буоллулар. Волонтердар бэтэрээннэргэ туох баар кыаллыбат, ыарахан үлэҕэ көмө буоларга бэлэмнэр. М.Аметова маҕаһыыныгар төлөпүөн нөҥүө наадыйар дьонтон сакаас ылаллар уонна дьиэҕэ аҕалан биэрэллэр. Күн аайы киэһэ 9 чаастан 11 чааска диэри «родительский патруль» тахсар, онон оҕолор «я дома» диэн фотоотчуоту кылаас салайааччытыга ыыталлар. Волонтер эдэр ийэ Раиса Дмитриева бэтэрээннэргэ маасканы тигэн түҥэтэр.

Вилена Рожина, 10 кылаас, дьиэтигэр олорон сорудахтарын оҥорор уонна ватсаабынан ыытар. Кини «Мин уонна сокуон» диэн РФ Конституция туһунан интеллектуальнай оонньуу кыайыылааҕа.