Алтынньы 5 күнэ -Учуутал күнэ! Учуутал оҕоҕо билиини биэрэрин таһынан, үтүөҕэ, кэрэҕэ уһуйан, хас биирдии үөрэнээччигэр дууһатын сылааһын иҥэрэн, идэтин таларыгар олук ууран, улуус, өрөспүүбүлүкэ, дойду кэскилин түстүүр ураты суолталаах киһи буолар. Ытыктабыллаах учууталлары, иитээччилэры, эбии үөрэхтээһин педагогтарын, педагогическай үлэ бэтэрээннэрин сырдык бырааһынньыккытынан эҕэрдэлиибит!
Нуучча улуу суруйааччыта Антон Павлович Чехов: «Киһиэхэ барыта кэрэ буолуохтаах: сэбэрэтэ, таҥаһа-саба, дууһата, өйө-санаата,» — диэн бэрт бэргэнник эппитэ. Биир оннук кэрэ киһинэн сарсыарда аайы эйэҕэс мичээрдээх оскуола аанын арыйан киирэр убаастыыр, таптыыр учууталым Людмила Сергеевна Тарасова буолар.
Людмила Сергеевна элбэх үтүөлээх учууталы үүннэрэн таһаарбыт Бүлүү педагогическай училищетыттан кынаттанан, салгыы Дьокуускайдааҕы педагогическай институту ситиһиилээхтик бүтэрэн, Бүлүү улууһун М.А.Алексеев аатынан Баппаҕаайы орто уопсай үөрэхтээһин оскуолатыгар алын кылаас учууталынан үлэлээбитэ 25 сыл буолла.Людмила Сергеевна — спортсменка, күрэхтэһиилэргэ, сүүрүүгэ бастыҥ. Үлэтиттэн ордон оскуола «Оһуор” үҥкүү ансаамбылыгар сылдьан, концертарга, куонкурустарга кыттар. Сайынын соҕуруу уонна тас дойдуларга күүлэйдиирин сөбүлүүр. Москваҕа, Санкт Петербурга, Нижний Новгородка, Новосибирскайга, Алтайга, Сочига, Калининградка, Кытайга Пекиҥҥэ, Египеккэ сылдьыбыта.
Аныгы үйэ тэтиминэн оҕо билиитин-көрүүтүн сайыннарар көрүҥ бэрт элбэх. Ол эрээри күннээҕи сонуну тута, “сойуппакка” тиэрдии – кэм ирдэбилэ. Людмила Сергеевна ол оннук сонун сүүрээни өссө 2001 сыллаахха «Көмүс бөрүө» диэн пресс-киин тэрийэн, киллэрбитэ. Оҕо ааҕар, ылынар дьоҕурун сайыннарыан, оҕоҕо толкуйдуур, ырытар сатабылы иңэриэн, оҕо санаатын, иэйиитин сатаан тылынан этэр-суруйар дьоҕурун арыйыан, сиэр-майгы өттүнэн үрдүк культуралаах буоларыгар иитиэн, айар дьоҕурун уhугуннарыан баҕаран учууталым айымньылаах үлэтэ саҕаламмыта…
Мин быйыл 11 кылааска үөрэнэбин, пресс-кииҥҥэ 2-с кылаастан дьарыктанабын. Оскуола олоҕун сырдатар, летопись матырыйаалын хаалларар сыаллаах ыйга биирдэ-иккитэ көмпүүтэринэн таhаарар хаhыаппыт аата «ОХ» (Оскуола хаhыата) диэн буолар. Хаhыаппыт балаhалара: «Оскуола эйгэтэ», «Спорт сонуннара», «Ыалдьыт», «Бу интэриэhинэй», «Сынньалаҥҥа», «Идэ». Хаhыаппыт тахсар тираhа сакаас быhыытынан бэчээттэнэр. Эдэр кэрэспэдьиэннэр хаhыат матырыйаалын хомуйарга оскуола оҕолорун, учууталларын, нэhилиэк уонна кэлии дьонун кытта алтыhан үлэлиибит.
2001 сылтан барыта 200-чэ оҕолор, эдэр кэрэспэдьиэннэр заметкалара «Кэскил», «Бэлэм буол+», «Олох суола» хаһыаттарга бэчээттэммитэ. Ол иһигэр мин хас да ыстатыйам тахсан үлэм түмүктээх буолбутуттан наһаа үөрбүтүм. Людмила Сергеевна хас биирдии оҕону кытары бэйэтэ туспа такайар ньымалаах, ол курдук ыстатыйа суруйарбытыгар ыйан-кэрдэн, сөптөөх тыллары туттарга үөрэтэр.
«Кэскил» хаhыат уонна Саха Өрөспүүбүлүкэтин оҕо общественнай түмсүүлэрин сойуустара, улуустааҕы «Олох суола» редакция тэрийэр бары куонкурустарыгар, ѳйтѳн суруйууга, айар үлэҕэ, уруhуйга кѳхтѳѳхтүк кыттабыт. Ситиhиибитин кѳрдѳрѳр туоhу, кэрэhи суруктарбыт, грамоталарбыт элбэхтэр.
Людмила Сергеевнаны кытта элбэхтик айанныыбыт. Бу сырыылар умнуллубат кэрэ түгэннэр буоланнар өйбөр-санаабар иҥэн сылдьаллар. Биhиги эдкордарга аналлаах улууска ыытыллар семинардарга сылдьан үѳрэнэбит, хаhыат үлэhиттэрин кытта кѳрсүhэбит. Өрөспүүбүлүкэтээҕи пресс-конференцияларга, эдкордар сүлүөттэригэр биирдиилээн да, бѳлѳҕүнэн да кыттыбыппыт. «Бэлэм буол – Кэскил – Юность Севера» хаhыаттар 70, 75, 80 сыллаах үбүлүөйдэригэр ыҥырыллан лааҕырдарга, сүлүѳккэ сылдьыбыппыт. Эдкордарбыт «Океан» лааҕырга, Скандинавия дойдуларынан сылдьан үѳрэнэн сынньаммыттара. Ѳйтѳн суруйуу, уруhуй күрэхтэригэр, араас тиэмэлээх куонкурустарга кыттан миэстэлэhэбит. Улуустааҕы оскуола хаhыаттарын күрэхтэригэр кыттан бастакы миэстэлэрдээхпит. Улуу Кыайыы 65, 70 сылларыгар ирдэбил үлэлэри толорон кыайыылаахпыт. 2013 с. Тыа сирин сылыгар «Бастыҥ эдкор» күрэххэ кыттан, «Бастыҥ эдкорпост-2013» номинация кыайыылааҕа буолбуппут.
Бу ситиһиилэрбит барыта салайааччыбыт Людмила Сергеевна улахан үлэтин түмүгэ. Кини дьыалабыай, эппиэтинэстээх, туруоруммут сыалы ситиһэр, үлэни таптыыр хаачыстыбалара биһиэхэ үтүө холобур буолар. Үлэбит түмүгэ өрүү ситиһиилээх, үөрүүлээх-көтүүлээх буолар, ити барыта дууһаны ууруллубут улахан үлэттэн тахсарын өйдүүбүт. Людмила Сергеевна элбэх наҕараадалардаах, онтон саамай улахана, суолталааҕа «Кэскил» хаһыат редактора Нина Протопопова аатынан бириэмийэ уонна «За воспитание любви к профессии журналиста» бэлиэ буолар.
Хаһыаты кытта доҕордоһуум үөрэххэ да, уопсастыбаннай олоххо да инники күөҥҥэ сылдьарга сирдиир. Оскуолабын бүтэрдэхпинэ, тыл хайысхатынан үөрэххэ киирэргэ быһаарынан сылдьабын. Айар, суруйар дьоҕурбун салгыы сайыннарыахпын баҕарабын. Дьарыкпын кынат оҥостон. олох устун илдьэ сылдьыам, үүнэрбэр, сайдарбар олук буолуо диэн эрэллээхпин.
Күндү Людмила Сергеевна! Учуутал күнүнэн итиитик-истиҥник эҕэрдэлиибин, дьолу-соргуну, махталлаах үөрэнээччилэри баҕарабын. Киһи бэйэтин олоҕор ситиһиилээх, бигэ тирэхтээх буоларыгар учуутал ийэ, аҕа кэнниттэн саамай суолталаах киһи буолар. ! Эһиги олоҕум суолун сөпкө туһаайбыккытыгар муҥура суох махтанабын!
Ааптар: Шамаев Данил, 11 кылаас үөрэнээччитэ, «Көмүс бөрүө” пост.
keskil14.ru