Олунньу 9-22 күннэригэр «Сосновый бор» лааҕырга «Саас» форум медиа сменаҕа үөрэнним. Бу аҕыйах күн иһигэр наһаа элбэххэ үөрэнним дии саныыбын.
Бастакы күннэргэ хамаанданан үлэни, оҥоруохтаах кылгас видеобытын толкуйдаан таһаарыыны, билбэт оҕолорбун кытта атын сиргэ олохсуйууну ыарырҕаппытым. Онтон дьэ кыра-кыралаан үөрэнэн испитим, үлэбит ис хоһоонун өйдөөбүтүм. Оҕолору кытта билсиһэн, кэпсэтэн, биир тылы булан хамаанда үлэтигэр киирбитим. Барытыгар көхтөөх кыттыыны ылбытым.
Дьону кытта сатаан кэпсэтэр, тэрийэр дьоҕурдааххын диэн хамаандабар медиа менеджер эбээһинэһин сүктэрбиттэрэ. Сүрүн соругум диэн спорт саамай түргэн национальнай көрүҥнэрин туһунан кылгас видео уһуллуутугар тэрийээччи, булааччы-талааччы, кэпсэтээччи буолуохтаахпын. Онон үс күн устата бэлэмнэнэн, кэпсэтэн, олунньу 13 күнүгэр хамаандабар анаан хаамыска, хабылык тренерин, учуутал идэлээх Анатолий Алексеевич Михайловы кытта көрсүһүүнү тэрийбитим. Анатолий Алексеевич көрдөрһүүбүн ылынан, Намтан «Сосновый бор» лааҕырга айаннаан кэлбитэ, маастар-кылаас ыыппыта, хабылык, хаамыска туһунан кэпсээбитэ. Ол көрсүһүү хамаандабыт айымньылаахтык үлэлииригэр наһаа көмөлөспүтэ.
Кылгас видео оҥоруу түмүгүнэн бастакы миэстэ буолбуппут уонна Анатолий Алексеевич Михайловка улахан махталбытын тиэрдибиппит. Онтон кини биһигини кыайыыбытынан эҕэрдэлээбитэ, хайҕаабыта, ситиһиилэри баҕаран үтүө тылын эппитэ. Истэргэ олус үчүгэй этэ.
Анатолий Алексеевич кыттыылаах видеобытын манна көрүөххүтүн сөп https://vk.com/wall-199463452_17759
Света ЗАРОВНЯЕВА, X кылаас, Хайахсыт, Чурапчы