Виктория Сивцева -Чурапчы Арыылааҕын оскуолатын биир көхтөөх үөрэнээччитэ. “Инникигэ хардыы” кэмпириэнсийэҕэ Клара Дагданчалыын өрөспүүбүлүкэҕэ 2 миэстэни ылан, Санкт Петербург куоракка “Открой в себе учёного” кэмпириэнсийэҕэ кыттыбыта. Ордук математика уонна нуучча литературатын уруоктарын сөбүлүүр. Былырыын математика олимпиадатыгар улууска 3 миэстэ буолбута. Уһун дистанцияҕа сүүрүүнэн дьарыктанар.
Төһө даҕаны оскуолатыгар эдэр кэрэспэдьиэннэр түмсүүлэрэ суоҕун иһин, бэйэтин баҕатынан “Кэскил” хаһыакка тиһигин быспакка суруйар. Ол иһин 2015 с. оччотооҕу Ил Дархан Егор Борисовы кытта көрсүһүүгэ ыҥырбыппыт. Маны таһынан, Вика “Чуораанчык” сурунаалбыт стипендиата буолар.
Вика Сивцева:
— “Цифровое поколение” симиэнэҕэ сылдьыбым миэхэ тугу биэрдэ? Туохха үөрэнним?
Бастаан биһигини программистар, дизайнердар, менеджердэр диэн академияларга араарбыттара. Мин программистар академияларыгар түбэспитим. Биһиги сүрүн сыалбыт – бырайыагы оҥоруу. Дьону интэриэһиргэтэр уонна туһалаах бырайыак буолуохтаах. Онон биһиги “Эко — апп” диэн мобильнай сыһыарыыны оҥордубут. Аан дойдуга күн аайы бөх бөҕө тахсар. Биһиги айбыт сыһыарыыбыт бөҕү наардыырга үөрэтэр сыаллаах. Оччоҕо айылҕаҕа хоромньу арыый аҕыйыа этэ. Уруһуйдуурбун сөбүлүүр буолан, бырайыакка логотип оҥорбутум.
Маны таһынан, араас бырагыраамалары туһанарга үөрэннибит, холобур, видео-аудио матырыйааллары монтажтыырга холоннубут.
Лааҕырга хас күн ахсын араас куонкурустар буолаллар, холобур, “Гик-фест”, “Дэнс баттл”, “Караоке”. Бэйэбит саастыы оҕолордуун бары биир интэриэстээх түмсэн, айа-тута сылдьарбыт олус үчүгэй. Учууталларбыт тиийимтиэтик быһаараллар, өйдөтөллөр. Манна кэлбиппиттэн олох кэмсиммэппин. Өссө да элбэх интэриэһинэй түгэннэр күүтэллэр диэн эрэнэбин. Уонна бырайыакпыт үтүө түмүктээх буолуон баҕарабын.
“Аныгы киһи “конкурентноспособнай” буолуохтаах”, — диэн ийэм үөрэтэр, онон бары хайысханан боруобаланан көрөбүн.
Ааптар: Таисия Алексеева
1
Молодец.