Тохсунньу 21 күнүгэр Саха Өрөспүүбүлүкэтин үөрэҕириитин үлэһиттэрин тохсунньутааҕы сүбэ мунньахтарын чэрчитинэн үгүс тэрээһин ыытылла турар. Ол курдук, «Үлэ квартала» кретивнай класстер «Экспо» саалатыгар «Профильнай үөрэхтээһин бастыҥ холобурдара» коммуникативнай сессия буолла.
Бу сессия Саха сирин оскуолалара уонна өрөспүүбүлүкэбит улахан тэрилтэлэрэ бииргэ алтыһан үлэлээтэхтэринэ туох үтүө түмүктэр тахсалларын көрдөрдө.

РОСНЕФТЬ уонна Өрөспүүбүлүкэтээҕи лиссиэй-интэринээт. 2021 сыллаахха ООО «Таас-Юрях Нефтегазодобыча» уонна Өрөспүүбүлүкэтээҕи лиссиэй-интэринээт сөбүлэҥ түһэрсэн лиссиэй техническэй кылааһа РОСНЕФТЬ кылаас буолбута. Ол туһунан лиссиэй дириэктэрин иитэр үлэҕэ солбуйааччы Айина Гаврильевна Филиппова сырдатта. Ол курдук, РОСНЕФТЬ кылааска сыл аайы 26 оҕо үөрэнэ киирэр. Бу кылааска оҕолор математика, физика биридмиэттэргэ эксээмэн, химия уонна информатика биридмиэттэригэр тестирование, ону таһынан «Роснефть» бэрэстэбиитэллэрин кытта собеседование ааһан киирэллэр. Бу кылааһы туйгуннук үөрэнэн бүтэрбит, наукаҕа, үөрэххэ, уопсастыбаннай үлэҕэ уһулуччу ситиһиилээх оҕолор 20 000 тиийэ сууммалаах стипендия ылыахтарын сөп эбит. Ону таһынан РОСНЕФТЬ кылаас учууталлара, кылаас салайааччылара квалификацияларын үрдэтэр куурустарга үөрэнэр кыахтаммыттар. Билиҥҥи туругунан РОСНЕФТЬ кылааһы 75 выпускник ситиһиилээхтик бүтэрэн талбыт үөрэхтэригэр киирэн үөрэнэ сылдьаллар.Бу бырайыак саамай сүрүнэ оҕолор инники олохторугар идэлэрин таларга, бу идэни уһулуччу баһылыылларыгар улахан көмө буолар.


Мэҥэ Хаҥалас улууһун М.Е. Попов аатынан Аллараа Бэстээх орто оскуолатыгар «Тимир суол кылаастара (Железнодорожные классы)» үлэтин туһунан оскуола дириэктэрэ Филипп Александрович Стручков уонна Р.И. Брызгалова аатынан Транспортнай техникум преподавателэ Сардана Ивановна Варламова кэпсээтилэр.


Оскуолаҕа геологическэй үөрэхтээһин туһунан Дьокуускай куорат «Центр глобального образования» гимназия дириэктэрэ Александр Владимирович Чудиновских кэпсээтэ. Оскуолалар бу курдук атын тэрилтэлэри кытта үлэлииллэрэ оскуола имиджын үрдэтиигэ, үөрэнээччилэр хаачыстыбалаах эбии үөрэҕи ылыыларыгар, инники идэлэрин талалларыгар улахан суолталааҕын бэлиэтээтэ.


Сессия түмүгэр Саха Өрөспүүбүлүкэтин «Арктика» үлэһит кадрдары бэлэмниир киин методиһа Людмила Кириллина региональнай «Мин бастакы идэм» бырайыак хоту улуустарга үлэтин туһунан сырдатта: «Бу бырайыак 5 үөрэх бырагырааматынан үлэлиир: фотограф БПЛА оператора, веб-дизайн, мото-транспортнай көлө суоппара, графическай дизайн. 60 квота бэриллибитин үс улууска аарааран Булуҥ, Үөһээ Дьааҥы, Жиганскай улуустарыгар алтынньы ыйтан үлэлэтэ турабыт».
Прокопий Софронеев