Мин үөрэҕи таһынан саамай сөбүлүүр дьарыгым – уруһуй эйгэтэ буолар. 2018 сылтан бу дьарыкпынан утумнаахтык ылсан саҕалаабытым. Кэлиҥҥи сылларга аныгы кэм хаамыытынан телефоҥҥа уруһуйдуурбун ордоробун.
Оҕолорго киэҕҥник тарҕаммыт ibisPaint X анал бырагырааманан үлүһүйэн уруһуйдуубун. Бу бырагыраама киһи бириэмэтин ылар, ол оннугар айар дьоҕургун уонна тулууру сайыннарар дии саныыбын. Бу манан сатабылбын хас күн аайы сайыннарабын уонна кэккэ ситиһиилээхпин.
Уруһуйдуур иэйии хантан кэлэрий? Бу ыйытыыга эппиэттиир уустук, киһи тылынан кэпсээбэт диэххэ сөп. Тугу саныырбын, баҕа санааларбын уруһуй нөҥүө тиэрдэбин эрэ диэхпин сөп. Сороҕор, айылҕаҕа сылдьан, ханнык эрэ үөнү-көйүүрү сэргии көрдөхпүнэ, онтон иэйии киирэр. Ол үөнү мин уобарас гынаммын киһи гынан ойуулуубун.
Бу дьарыгым миэхэ айар дьоҕурбун сайыннарар уонна маннык дьарыктанаммын мин сынньанабын.
Онон уруһуй — мин олоҕум суолтата, олоҕум аргыһа буолар.
Оҕолоор, күҥҥүтүн туһалаахтык атаарыҥ!
Айна АРГУНОВА, 8 кылаас үөрэнээччитэ,
«Дьоҕур» пресс-киин, Кэбээйи орто оскуолата.