Остуол тенниһэ Саха сиригэр сайдыыта Чурапчы улууһун кытары ыкса ситимнээх. Чурапчы улууһугар 1957 сылтан саҕалаан, остуол тенниһэ оҕо-аймах кутун-сүрүн туппута, спорт биир саамай маассабай умсугутуулаах көрүҥэр кубулуйбута. Оччотооҕуга бэйэ оҥорбут хаптаһын остуолга фанера ракеткаларынан, кинигэлэринэн сетка курдук туруоран оонньуур этилэр.
Теннис сайдыытыгар Чурапчы оройуона сүрдээх улахан хамсааһыны, үлэни тэрийбитэ. Остуол тенниһинэн хайа баҕарар саастаах киһи дьарыктаныан сөп. Түргэн толкуйу, хамсаныыны сайыннарар спорт биир көрүҥэ буолар.
Изот Кривошапкин, Чурапчы улууһун Хатылы орто оскуолатын V кылааһын үөрэнээччитэ, теннистиирин сөбүлүүр. Улахан таһымнаах күрэхтэргэ кыттан кыайыар-хотор. Саха сирин остуолун тенниһин саҥа сулуһа, инники кэскилэ.
– Аан бастаан бэйэн тускунан сырдат эрэ.
– Мин дьиэ кэргэммэр иккис оҕонон төрөөбүтүм. Биһиги бииргэ төрөөбүт сэттиэбит.
– Үөрэххэр хайдаххыный?
– Үөрэхпэр үчүгэйбин.
– Остуол тенниһин эйгэтигэр хайдах кэлбиккиний? Бастаан ракетканы туппуккар санаатахха хайдах этэй?
– Биһигини кыра эрдэхпититтэн аҕабыт Геннадий Изотович дьарыктаабыта. Убайым, быраатым уонна балтым остуол тенниһинэн утумнаахтык дьарыктаналлар. Бэйэм ракетканы уонна мээчиги үс сааспар тутан-хабан, холонон көрбүтүм. Олус кэрэхсээбитим бу спорт көрүҥүн. Онон билигин мин бу сүрүн дьарыгым, хаһан баҕарар, ханна баҕарар оонньуур тэрилбин үрүсээккэ укта, илдьэ сылдьабын.
– Хайдах тиэхиньикэнэн оонньуугун, эрчиллии хайдах ааһарый, ким эрчийэр?
– Кытайга Харбин куоракка үөрэнэ сылдьыбытым. Онно кытайдар остуол тенниһигэр киирсэргэ аналлаах эрчиллиилэрин, тиэхиньикэлэрин үөрэппитим. Биир сыл дьарыктаммытым. Эбиллибитим аҕай, оонньуу имигэстик хамсанарга, илиим былчыҥнарын сайыннарарга туһалаабыта. Күн аайы күүстээх дьарыктар буолан ааспыттара.
– Ситиһиилэргин кэпсиэҥ дуо?
– 2019 сылга Германияҕа норуоттар икки ардыларынааҕы күрэххэ иккилии буолан киирсиигэ Андрей Марковтыын I миэстэ буолбуппут. Ол кэннэ Санкт-Петербург куоракка соҕотохтууга эмиэ норуоттар икки ардыларынааҕы турнирга III миэстэни ылбытым. Оттон Красноярскайга I миэстэ буолбутум уонна өрөспүүбүлүкэҕэ бастаан турардаахпын.
– Сөбүлүүр, холобур оҥостор теннисииһин ким буоларый?
– Ньиэмэс Тимо Болль остуол тенниһигэр үс төгүллээх Олимпиада призера, аан дойдуга соҕотохтуу кэрдиискэ I ракетка буолар. Мин кини киирсэр оонньууларын видеотын көрөөччүм. Күүстээх өрүттэрин, албастарын бэлиэтээн, дьарыкка оҥорооччум.
– Быйыл ханнык күрэхтэһиилэргэ кыттыбытыҥ туһунан кэпсээ.
– Быйыл төһө даҕаны ыарыы турбутун иһин, сорох күрэхтэһиилэр буоллулар. Екатеринбургка кытынным уонна Оренбургка Топ-24 ситиһиилээхтик кииристим. Күрэхтэһии сүрдээх сытыытык, тыҥааһыннаахтык барбыта. Мээчик биир кэм өрө тэйэн, ракетка күөрэҥнээн олорор курдук этэ.
– Билигин кэтэн спортивнай экипировкан туһунан кэпсээ. Бу манна ааҕааччыларга тугу сүбэлиэҥ этэй?
– “Butterfly” диэн фирма таҥастарын кэтэбин. Ракеткам, мээчигим эмиэ итинтэн ылааччыбыт. Хаачыстыбата үчүгэй.
– Оҕолорго тугу сүбэлиэҥ этэй?
– Билигин остуол тенниһэ улаханнык сайынна. Оҕолор бары спордунан дьарыктаныҥ, ситиһиилээх уонна доруобай буолуҥ! Спортсмен ханна да сырыттар, төрөөбүт алааһын, улууһун, өрөспүүбүлүкэтин аатын үрдүктүк тутуохтаах.
Ааптар: Павел Ильин.