Гимназиябыт күнэ быйыл үөрэҕи түмүктүүр күнү кытта сөп түбэһэннэрэн буолан ааста. Бу күнү бары даҕаны долгуйа кэтэспиппит. Сарсыардаттан учууталлар аһаҕас кылаас чаастарын ыыттылар, онтон оҕолорун кытта бырааһынньыктааҕы остуолу бэлэмнээн оонньоон-көрүлээн, кэпсэтэн-ипсэтэн, үөрэн-көтөн минньигэстик эбиэттээтибит.
Салгыы гимназия күнүн үөрүүлээх чааһа “С.А. Зверев-Кыыл Уола аатынан норуот айымньытын киинигэр” ыытылынна. Үөрүүлээх чаас гимназия өрөгөйүн ырыатыттан саҕаланна. Оскуолабыт бас-көс киһитэ, дириэктэрбит, Любовь Егоровна, саалаҕа мустубут бары гимназия оҕолорун, учууталлары, төрөппүттэри бу үөрүүлээх күнүнэн, үгэскэ кубулуйбут кэрэ-бэлиэ бырааһынньыгынан эҕэрдэлээтэ. Былырыыҥҥы үөрэх дьылын түмүгүнэн, араас таһымнаах күрэхтэргэ, кэмпириэнсийэлэргэ, олимпиадаларга оҕолору бэлэмнээн үрдүк ситиһиигэ кынаттаабыт икки бастыҥ учууталы «Two Top Teachers» Андриан Егорович Максимовы, технология учууталын, уонна Акулина Яковлевна Иванованы, саха тылын уонна литературатын учууталын, бэлиэтээтэ, Хайҕал суругунан уонна анал өйдөбүнньүк бэлиэнэн наҕараадалаата.
Оҕо ситиһиитэ аҥардас учууталтан эрэ буолбакка, бастатан туран, дьиэ кэргэнтэн тутулуктаах. Онон сиэттэрэн оҕолорун тустарыгар өрүү кыһаллар, оскуола олоҕор куруутун төһүү күүс буолар уон бастыҥ төрөппүт “Ten Top Parents” бу күн эмиэ чиэстэннэ. Ол курдук, Виктория Петровна, Егор Егорович Николаевтар, Михайлов Дмитрий Иванович, Тамара Ивановна, Вячеслав Романович Константиновтар, Дормидонтова Мария Георгиевна, Федоров Айсен Алексеевич, Ирина Николаевна,Павел Анатольевич Осиповтар, Елена Степановна, Роман Радионович Амоновтар, Иванова Софья Васильевна, Уаров Роман Егорович, Людмила Викторовна Владимир Валерьевич Николаевтар, Анастасия Владимировна, Андрей Николаевич Николаевтар, Мария Игнатьевна Николай Климович Даниловтар. Салгыы үөрэхтэригэр туйгун, араас олимпиадаларга, научно-практическай конференцияларга ситиһиилээхтик кыттыбыт, спортивнай күрэхтэһиилэргэ үрдүк көрдөрүүлээх 10 бастыҥ үөрэнээччини “Ten Top Teens” үрдүк сценаттан ыҥыртаан, көмүс буукубанан суруллубут лиэнтэлэри кэтэртэ, хайҕал суруктарынан наҕараадалаата. Ол курдук, быйылгы бастыҥ үөрэнээччилэр ааттарын сүктүлэр: Уаров Костя Х кылаас, Иннокентьева Карина IX кылаас, Андреева Лилия IX кылаас, Шергина Милена IX кылаас, Осипова Валя IX кылаас, Николаев Тимофей XI кылаас, Уарова Лиана XI кылаас, Контогоров Вася VIII ”а” кылаас, Никифоров Айхал VIII ”б” кылаас, Иванов Владик XI кылаас.
Маны сэргэ быйылгы үөрэх дьылыгар президенинэн талыллыбыт ураты көрүүлээх, сонун идиэйэлэрдээх Х кылаас үөрэнээччитэ Рада Николаева оҕолор, учууталлар уонна төрөппүттэр иннилэригэр бэйэтин андаҕар тылын эттэ. Итини таһынан, Любовь Егоровна бэйэни салайыныы салалтатын саҥа састаабын кытта билиһиннэрдэ, чилиэннэргэ туоһулуур докумуоннары туттарда.
Үөрүүлээх чаас кэнниттэн Саха АССР төрүттэммитэ 100 сылыгар аналлаах “Эллэй эһэбит саҕаттан” уус-уран дьүһүйүү ыытылынна. Дьүһүйүү ис хоһооно Эллэй эһэбит саҕаттан саҕалаан, өрөспүүбүлүкэбит кэрдиис кэмнэринэн сайдан испит суолун, Автономия олохтонуутун, Аҕа дойду Улуу сэриитин, Кыайыы өрөгөйүн, саҥа олох тэриллиитин көрдөрүү буолар. Манна оскуолабыт оҕото барыта хас биирдии нүөмэргэ сүрдээх эппиэтинэстээхтик сыаһыаннаһан кытынна. Биллэн турар, таҥас-сап өттүнэн төрөппүттэрбит бу тэрээһиҥҥэ улахан төһүү күүс буоллулар, түгэнинэн туһанан кинилэргэ барҕа махталбытын тиэрдэбит.
Гимназия күнүн түмүктүүр бүтэһик сүрүн чаас — баал. Классическай музыка доҕуһуолугар уйдаран пааралар киирэллэр. Күрэх түмүгүнэн “Принцесса уонна Принц”, “Король уонна Королева” талыллаллар. Быйылгы баалга “Принцесса” аатын VII ”а” кылаас үөрэнээччитэ Лукина Нелли, оттон “Принц” аатын VIII ”б” кылаас үөрээччитэ Дмитриев Даниил ыллылар. Оттон баал “Королеватынан” X кылаас үөрэнээччитэ Рада Николаева уонна “Король” XI кылаас үөрэнээччитэ Архипов Алексей буоллулар.
Күүтүүлээх гимназиябыт күнүн оҕолуун, учууталлыын, төрөппүттүүн бүттүүн бу курдук үөрэн-көтөн туран атаардыбыт.
Лиана Уарова, XI кылаас,
Сунтаар гимназията