Ааспыт нэдиэлэҕэ “Төрөппүттэр КГЭ-ни туттарар биир кэлим күннэрэ” диэн Бүтүн Россиятааҕы аахсыйа саҕаланна. Тэрээһин төрөппүт КГЭ хайдах ааһарын илэ хараҕынан көрдүн, этинэн-хаанынан биллин диэн сыаллаах-соруктаах иккис сылын ыытыллар.
Үгүстэр: “Оҕолорбут тимири көрдүүр тэрил (металлоискатель) нөҥүө ааһаллар, эксээмэни камера анныгар олорон суруйаллар”, – диэн долгуйаллар. Киһи тулуйбат кытаанах усулуобуйатын курдук саныыллар.
Ол курдук, Үөрэх хаачыстыбатын кэтээн көрөр киин үлэһиттэрэ этэллэринэн, бастакы күн саамай хорсун төрөппүттэр кэлэн, нуучча тылыгар билиилэрин тургутан көрдүлэр.
– Бу аахсыйаҕа кыттыбыт, эксээмэни ааспыт ийэлэр, аҕалар, эбэлэр, эһэлэр 11 сылы быһа үөрэммит, бэлэмнэммит оҕо КГЭ-ни холкутук туттарар кыахтааҕын, онуоха ханнык да камера мэһэйдээбэтигэр итэҕэйэн, уоскуйан бараллар, – диир тустаах киин судаарыстыбаннай аттестацияны ыытыыга отделын начаалынньыга Наталия Тимофеева.
Үөрэх миниистирэ Владимир Егоров этэринэн, өрөспүүбүлүкэ КГЭ-ни ыытарга балачча уопуттаах. Онон оҕолору долгутар эксээмэн 18 сыл тухары хаамыыта барыта сааһыланан, үөрэнээччилэр көрдөрүүлэрэ тупсан иһэр.
Оскуоланы бүтэрбиппит ырааттаҕа
Варя Максима, ырыаһыт, төрөппүт:
– Кыыһым быйыл КГЭ-ни туттарар. Дьүөгэм Лиза (Газизова – аапт.) ыҥыран, кыттаары кэллим. Бэйэм КГЭ-ни туттарбатаҕым, биһиги саҕана киирэ илигэ. Нуучча тылыгар үчүгэйдик үөрэммитим. Онон этэҥҥэ туттардым ини диэн эрэнэбин.
Надежда Васильева, төрөппүт:
– Улахан уолум оскуоланы эһиил бүтэрэр. Бэҕэһээ ыҥырбыттарыгар, киэһэ КГЭ сорудахтарын Интэриниэккэ киирэн көрбүтүм, бэлэмнэммитим. Туттарыахха сөп диэн уоскуйбутум.
Биһиги оскуоланы бүтэрбиппит ырааттаҕа дии. Кэлин нуучча тылыгар анаан үөрэммэтэхпит. Ол эрээри, оскуолатааҕы билиибит билигин да баар, киһи син өйдүүр эбит.
Бүгүн бары да суруйарга бэрт дьон кэлбиппит диэн көрдүм. Биэрбит лиистэрэ нэһиилэ тиийдэ. Киһи үксүн билбэтиттэн куттанар дии саныыбын.
Уолуйдахха, долгуйдахха, билэргин да умнаҕын. Психолог быһыытынан оҕолорго куттанымаҥ диэн сүбэлиибин. Эксээмэҥҥэ үөрэтэ сылдьар матырыйаалым кэлэр, билэбин, кыайыам диэн бигэ санаалаах киириэхтэрин наада.
Бүтүн Россиятааҕы аахсыйа Саха сирин бары улуустарыгар олунньу 28 күнүгэр диэри салҕаныаҕа.
Айыына
КСЕНОФОНТОВА.
Аныгыскы нүөмэргэ “Кэскил” хаһыат суруналыыһа КГЭ күнүгэр хайдах кыттыбытын, эксээмэни төһө бэркэ суруйбутун, туохтан долгуйбутун сиһилии ааҕаарыҥ.