Атырдьах ыйын 15 күнүгэр «Энергетик» лааҕыр «Энергетика лета» смена оҕолоругар Үөрэх инновационнай сайдыытын киинин дириэктэрэ Дмитрий Кириллович Титов кэлэн ыалдьыттаата. Кини биһиэхэ, төрүччүбүтүн үөрэтэ сылдьар оҕолорго «Мин кимминий? Хантан төрүттээхпиний? Төрүттэрим туох сатабыллаах, туох дьарыктаах дьон этилэрий?» — диэн олус дириҥ, толкуйдатар тиэмэлэр тула кэпсэтиини ыытта.
Мин кимминий? Мин таах мээнэ баар буолан хаалбатаҕым. Төрүттээхпин. Уустаахпын. Кинилэр хааннара миэхэ баар.
Төрүччүбүтүн үөрэтэрбитигэр төрүттэрбит ааттарын эрэ буолбакка, кинилэр туох дьарыктаах, сатабыллаах буолалларын эмиэ билиэхтээххит диэн эттэ. Төрүттэрбит сатабыллара биһиэхэ бэриллэрин өйдөөтүбүт. Холобур, салайааччы, уус эбэтэр үлэһит хос эһэлэрбит, хос эбэлэрбит сатабыллара биһиэхэ хааммытыгар баар буоллаҕына биһиги ону сайыннарыахпытын сөп.
Дмитрий Кириллович өссө санаа күүһүн, толкуйдаах буолуу туһунан кэпсээбитэ. Сырдык санаалаах киһи олоҕо сырдык буолар. Куһаҕаны саныы сылдьар киһи олоҕо туох да үчүгэйэ суох, хараҥа буолар. Ол иһин куһаҕан оонньуулары оонньуур, кутталлаах киинэлэри көрөрбүт санаабытын буортулуур эбит. «Киһи санаа кулута» диэн бэргэн этиини сэргии иһиттим.
«Саха омугун инникитэ сиригэр уонна тылыгар. Саха омук тылын, төрдүн харыстыахтаах, дойдутугар бэриниилээх буолуохтаах, бэйэтин көрүнэ сылдьыахтаах — оччоҕо биирдэ Саха аатын ааттатар.»
Уйгулаана ДАНИЛОВА, VIII кылаас, Туора-Күөл орто оскуолата, Таатта