Үс аҥаар сааспытыттан сайын аайы сайылыыр сайылыкпытын Хааһы Алыытын томороон тымныылаах кыһыны быһа саныыбыт. Хааһы Алыытын киэҥ хонууларын, дэлэй отонноох, сугуннаах ойуурдарын, хойуу оттоох ходуһаларын ахтабыт.
Биһиги хас сайын ахсын Алыыбытыгар кэлэн оттуубут, үөрэхтэн, үлэттэн сынньанабыт. Сайылыкпытыгар күтүөппүт Слепцов Михаил Александрович-Ээкис салайааччылаах биригээдэнэн тахсан оттуубут. Ол биригээдэҕэ аҕабыт, убайдарбыт Маркс, Сэмэн, Данил, Никита буолан сайын сүөһүлэргэ кыһыҥҥы кыстыкка от оттууллар. Эбээбитин кытта Чирикова Роза Егоровналыын сайылыктааҕы дьиэбитигэр хаалан отчуттарга ас астыыбыт, дьиэ ис-тас үлэтин үлэлиибит.
Быйыл өһүөн сыл турбут буолан, ходуһаларбыт отторо хойуутук үүнэн, 11 улахан кээһиилээх от турда. От үлэтин туһунан кэпсиир буоллахха, бастаан үүнэн турар оту эр дьон от охсор косилканан охсоллор. Ол кэннэ трактор ворошилкатынан от мунньан, от инчэҕэй буоллаҕына тэппэлэри оҥоробут, оттон кураанах от буоллаҕына үргүлдьү субуулары оҥортолуубут. Онтон тэппэлэри, субуулары атырдьаҕынан үрүт үрдүгэр уурталаан бугуллары оҥортолуубут. Бүтэһигэр ол бугулларынан оту кээһэн үлэбитин түмүктээн үөрэн-көтөн дьиэбитигэр төннөбүт. Ол курдук Тоҕойго 4 от турда, Остооллооххо 5 от, улахан ходуһаҕа 2 от, оттон Дьыралаампыйга быйыл оттооботохпут.
Ону таһынан сайылыкпытыгар саҥа хотон тутуллан, ынахтарбытын сайылыкпытыгар аҕалан ыыбыт, мэччитэбит. Ынахтары улахан дьон ыыллар, оттон биһиги торбостору аһатабыт.
От үлэтэ бүппүтүн кэннэ, сайылыкпыт таһынааҕы ойуурдарга тахсан, айылҕабыт быйаҥнаах аһа ситтэҕинэ сугун, отон, тэллэй, дьэдьэн хомуйан кыһыҥҥы кыстыкка бэлэмнэнэбит. Аҕабыт, убайдарбыт балыктаан, күһүҥҥү куһу бултаан, томороон тымныылаах кыһыммытыгар хаһаанабыт.
Биһиги санаабытыгар, хас биирдии киһи төрөөбүт-үөскээбит, улааппыт дойдутун үйэтин тухары киэн туттуохтаах, ытыһын үрдүгэр тутуохтаах, хараҕын харатын курдук харыстыахтаах, ытыктыахтаах, ыраах сылдьан ахтыахтаах, саныахтаах. Ол иһин биһиги төрөппүттэрбит биһигини кыра сааспытыттан окко, үлэҕэ уһуйбуттара.
Биһиги Хааһы Алыыбытын наһаа күүскэ таптыыбыт, ытыктыыбыт, ахтабыт.
Айсена СЛЕПЦОВА, Боруулаах орто оскуолатын 7 кылааһын үөрэнээччитэ.