«Үөһээ Бүлүү» хаһыат бирииһигэр чэпчэки атлетика эстафетатыгар Үөһээ Бүлүү улууһун 24 оскуолата уонна нэһилиэк хамаандалара илин-кэлин түһүстүлэр. 24 оскуола 3 бөлөххө арахсан сүүрдүлэр. 1961 сылтан тохтоло суох ыытыллар. Быйыл 64-с төгүлүн ыытыллар буоллаҕына, эһиил үбүлүөйдээх 65 сыла.
Эстафета сүрүн сыала-соруга Үөһээ Бүлүү улууһугар чэпчэки атлетиканы сайыннарыы уонна чөл олоххо көҕүлээһин, бииртэн-биир чулуу спортсмены таһаарыы буолар. Ол курдук, 1 бөлөххө эрэллээхтик инники күөҥҥэ, эстафета былырыыҥҥы кыһыл көмүс кубогын хаһаайына, И.Н.Барахов аатынан 1 нүөмэрдээх оскуола хамаандата бастаата. Иккис үктэлгэ Үөһээ Бүлүүтээҕи гимназия буолла, биэтэккэ үсүһүнэн Өрөспүүбүлүкэтээҕи лиссиэй-интэринээт хамаандата кэллэ.
Нэһилиэктэр икки ардыларыгар эстафетаҕа 1 миэстэни, барыларын ырааҕынан хааллартаан, Тамалакаан нэһилиэгэ, 2 миэстэ — Үөһээ Бүлүү хамаандата, 3 миэстэҕэ Дүллүкү быһыйдара буоллулар.
«Кыайыыга дьулуурун иһин» анал аат Быракаан сүрүн оскуолатын 2 -скылааһын үөрэнээччитигэр Амелия Баянаеваҕа бэрилиннэ.
«Кини инники буолар эстафеталарга өссө да 9-та сүүрэрэ баар» диэн улуустааҕы спорт управлениетын начальнига Егор Алексеевич Николаев эппитэ кырачаан сүүрүүк кыыс ситиһиитэ өссө да иннигэр буоларын кэрэһэлиир.
«Үөһээ Бүлүү» хаһыат 20000 тыһыынчалаах сүрүн бирииһин иккис төгүлүн Александр Иванов тутта. Дүллүкү орто оскуолатын 11 кылааһын үөрэнээччитэ Сергей Иванов 300 миэтэрэҕэ бастаан, анал бирииһинэн наҕараадаланна. Серёжа улууска биллэр эдэр спортсмен, былырыыҥҥы эстафетаҕа эмиэ бастакы этапка кыайбыта. Маны таһынан, 11 кылааһы бүтэрэр, эстафетаҕа сылын аайы көтүппэккэ кыттар оҕолорго редакция аатыттан бочуотунай грамоталары туттартаатылар.
Быйылгы эстафетаҕа Арассыыйа 5 төгүллээх чемпиона, Парижка ыытыллыбыт Олимпиада кыттыылааҕа, Норуоттар икки ардыларынааҕы кылаастаах спорт маастара Сардаана Трофимова төрөөбүт нэһилиэгин хамаандатыгар киирэн сүүрбүтэ кыттааччылар уонна көрөөччүлэр сүргэлэрин көтөхтө. Мин Сардаана Александровнаттан ыйытыыларбар эппиэттииригэр көрдөстүм.
-«Үөһээ Бүлүү» хаһыат эстафетатыгар төрөөбүт нэһилиэгим Тамалакаан чиэһин көмүскүү кэллим. Урут кыра кылаастарга сылдьан эстафетаҕа элбэхтэ кыттан турардаахпын. Тамалакаантан куруук толору састааптаах кэлэн кыттар этибит. Билигин мин улахан дьарыктартан, күрэхтэһиилэртэн сынньана сылдьабын. Формабыттан тахсыбат эрэ курдук кыралаан дьарыктанабын. 400 миэтэрэҕэ сүүрдүм. 400 эрэ миэтэрэ диэтэххэ ыарахан соҕустук ааста. Сүүрүү киһиэхэ тулуурдаах, үлэни сөбүлүүргэ, туохтан да бэриммэккэ инниҥ диэки бара турарга үөрэтэр, сайыннарар. Улаханы былааннаан, баҕа санааланыҥ, туруорбут сыалгытын ситиһиҥ, дьарыктаныҥ! Спорт киһини үчүгэйгэ угуйар. Спорду сөбүлээҥ, доруобай, чэгиэн буолуҥ!
Кэнтик нэһилиэгиттэн эстафета кыттыылааҕа Степан Анатольевич Родионов санаатын үллэһиннэ:
— Спорт бэтэрээнэ буолан баран хаһыат бирииһигэр сүүрүүгэ кыттыбытым. Быйыл 4-с сылым. Сүүрүү киһиэхэ сыал-сорук туруорунарга, ону толорон үтүө түмүгү ситиһэргэ туһалаах. Киһи характерын күүскэ сайыннарар. Сүүрүүнэн дьарыктаныҥ, доруобай буолуҥ!
«Үөһээ Бүлүү» хаһыат бирииһигэр эстафета сыл ахсын сүүрүүнү сэҥээрээччилэри, спорду таптааччылары, ааттаах-суоллаах спортсменнары биир күрэххэ, сыалга-сорукка түмэр. Төгүрүк сыл устата киһи барыта күүтэр, кэтэһэр, утумнаахтык дьарыктанар. Сылтан сыл күүстээх спортсменнар ааттара ааттана турар. Бу эстафета кыттыылаахтарыттан инникитин ким эмэ, биир дойдулаахпыт Сардаана Трофимова курдук, олимпиадаҕа тиийэр үрдүк таһымнаах буолан күрэхтэһиилэргэ кыттар чиэскэ тиксиэ. Ааттаах-суоллаах улахан спортсменнар Үөһээ Бүлүүттэн үүнэн-үөскээн, силистэнэн тахсыахтара диэн эрэнэбит. Спорду таптааҥ, чөл олоҕу тутуһуҥ, чэгиэн-чэбдик буолуҥ!
Алина Санникова,
X кылаас,
«Эрчим» медиа киин юнкора,
Дүллүкү орто оскуолата, Үөһээ Бүлүү