Үөһээ Бүлүүтээҕи М.Т. Егоров аатынан 2-с нүөмэрдээх агрооскуола оранжереятыгар сибэкки эгэлгэтэ, оҕуруот арааһа үүнэ турарыттан кини санаата көтөҕүллэр.
Оранжерея иһигэр оҥоһуу полкаларга, стеллажтарга, анал сибэкки иһиттэригэр дьэрэкээн сибэккилэр кэчигирэспиттэр, сорохторо кашполарга тураллар. Оҕурсуу дыргыл сыта киһини манньытар. Дьэдьэни тохсунньуттан саҕалаан олордон, сайыҥҥы өттүгэр парникка, онтон оранжереяҕа киллэрэн салгыы көрөллөр-харайаллар.
Оҕолор уонна салайааччы сылаас илиитинэн бүөбэйдэнэн үүнэ тураллара өтө көстөр. Сылы быһа төгүрүччү араас үүнээйини олордон, оҕолор элбэх албастарга үөрэнэллэр. Онон оскуола остолобуойун битэмииннээх аһынан хааччыйаллар.
“Быйыл оҕурсуу, помидор, салаат, укуруоп сэтинньи ыйтан олордон саҕалаатыбыт. Укуруобу, салааты түөртэ ыстыбыт. Оҕурсууну, помидору үстүү суорду олортубут. Манна ВУД-ка үөрэнэр оҕолор үлэлииллэр. Кыһыҥҥы өттүгэр сиигэ суох буолан оҕуруоту олордорго соччото суох эбит. Күҥҥэ иккитэ уунан ыһабыт, кэлин “увлажнитель воздуха” ылан туһана сылдьабыт. Салааты, укуруобу, оҕурсууну быһан остолобуойбутугар туттарабыт.Билигин оҕолор 15 араас бегония араас суордун череноктаан олордон саҕалаатылар. 150 устуука тюльпан олордубуппут.Үүммүт сибэккилэрбитин сааскы бырааһынньыктарга атыылаабыппыт.
Ону таһынан клубника уонна эустома олордон саҕалаатыбыт. Инники былааммыт диэн эһиил кыһыҥҥы оранжереяҕа оҕурсуубутун, помидорбутун ситэри үөрэтэн, чинчийэн баран олордуохпут”, — диэн оскуола агронома Елизавета Дмитриевна кэпсээтэ.
Оҕолор бу көрөн-харайан кэлбит үүнээйилэрин туһунан дакылаат суруйан, чинчийбит үлэлэринэн араас таһымнаах конференцияларга, ааҕыыларга ситиһиилээхтик кытталлар. Холобур, бу соторутааҕыта ыытыллыбыт Чугуновтуу ааҕыыларга 11 кылаас үөрэнээччитэ Каролина Тарасова “Будущее сельское хозяйство- это УПБ АгРосток” тиэмэнэн кыттан 1 истиэпэннээх диплом буолла. Оттон салайааччы Дмитриева Елизавета Дмитриевна республикатааҕы Алексеевтыы ааҕыыларга үлэтин опытын кэпсээн 3 истиэпэннээх дипломунан наҕараадаламмыта.
Эбии дьарыкка үөрэнэллэр оҕолор оҕуруоту үүннэриигэ, көрүүгэ-харайыыга үөрэнэн кэлин олохторугар тутталларыгар олук буолуо. Онон агрооскуола оҕону олоххо бэлэмниир биир ураты ньымата буолар.
Үөһээ Бүлүүтээҕи М.Т. Егоров аатынан 2 №-дээх орто оскуола “Сыккыс” пресс-киинэ.