Биһиги лиссиэйбитигэр XXVI улуустааҕы, V өрөспүүбүлүкэтээҕи Татьяна Егоровна Дуткина аатынан математика олимпиадата буолан ааста. Математика олимпиадата улууспут 22 оскуолатыттан 185 оҕону түмтэ. Өрөспүүбүлүкэ араас муннуктарыттан 15 оскуолаттан 633 оҕо кэтэхтэн кытынна. Онон математика предметын сөбүлүүр 818 оҕо кыттыыны ылла.
Бу олимпиада XXVI төгүлүн Российскай Федерация үтүөлээх учуутала, Үлэ Албан аата уордьан толору кавалера, Д.И. Васильев-Очинскай бириэмийэтин лауреата, «Дети Саха-Азия» Аан дойдутааҕы фонда стипендиата Татьяна Егоровна Дуткина аатынан ыытыллар. Математика курдук уустук предмеккэ оҕолор бэйэлэрин билиилэрин тургуттулар.
Олимпиада арыллыытыгар лиссиэй бастыҥ, активист оҕолоро оскуолабытын билиһиннэрдилэр. Лөгөй лиссиэй-интэрнээт дириэктэрэ Михаил Петрович Пухов, Өрөспүүбүлүкэтээҕи лиссиэй-интэрнээт учуутала Т.Е Дуткина коллегата, сылын аайы ыытыллар олимпиада дьүүллүүр сүбэ бэрэссэдээтэлэ Михаил Николаевич Данилов эҕэрдэ тылларын эттилэр, кыттааччыларга ситиһиини баҕардылар. Татьяна Егоровна Дуткина сиэнэ Сардаана Рихард Крылова, хос сиэнэ Анжелика Олесова Т.Е. Дуткина аатынан математика кылааһыгар сэмэй бэлэхтэрин туттардылар.
Дьүүллүүр сүбэнэн Хотугулуу Илиҥҥи Федеральнай Университет математика-информатика хайысхатын V кууруһун устудьуоннара Николай Новгородов, Виктория Агеева, III куурус устудьуоннара Намина Харитонова, Валентина Алексеева, Виктория Семенова уонна дьүүллүүр сүбэ салайааччыта М.Н Данилов үлэлээтилэр.
Маны таһынан, өрөспүүбүлүкэ оскуолалара кэтэхтэн олимпиадаҕа, научнай-практическай конференцияҕа кытыннылар. Научнай-практическай конференцияҕа оҕолор математика, физика, информатика предметтэргэ сыһыаннаах үлэлэрин дьүүллүүр сүбэҕэ билиһиннэрдилэр.
Олимпиада кэнниттэн оҕолор аактабай саалаҕа оскуолаларынан арахсан, математикаҕа уонна Улуу Кыайыы 80 сылыгар аналлаах тиэмэлэринэн сорудахтаах оонньууларга кытыннылар. 12 хамаанда кыттыыны ылла. Маны таһынан спорт саалаҕа анал тэрээһин ыытылынна.
Биһиги Михаил Николаевич Даниловы көрсөн кэпсэттибит.
– XXVI төгүлүн ыытыллар математика олимпиадата олус тэрээһиннээхтик, үрдүк таһымҥа ааста. Лөгөй лиссиэй коллективыгар махталбын биллэрэбин. Татьяна Егоровна Дуткина аатыгар ыытыллар олимпиаданы хас сылын аайы наһаа тэрээһиннээхтик уонна киэҥ далааһыннаахтык ыыталларын бэлиэтиибин. Быйылгы олимпиадаҕа урукку сыллартан уратыта диэн Горнай улууһуттан кыттааччылар кэлбиттэрэ буолла. Олимпиадаҕа атын улуустан кэлии суоҕа, быйыл горнайдар кэлбиттэрэ соһуччу буолла. Тэрийээччилэр биһиги олус үөрдүбүт. Математика олимпиадатыгар кыттыбыт бары оҕолорго өссө да умсугутуулаахтык салҕыы дьарыктаналларыгар баҕарабын. Уустук садаачалары суоттаан, сөптөөх эппиэти ылар үөрүүтүн билэллэригэр баҕарыам этэ, – диэн Михаил Николаевич санаатын үллэһиннэ.
Быйылгы олимпиадаҕа Мүрү 1, Мүрү 2 №-дээх оскуолалара, Мүрүтээҕи «Уолан» гимназия уонна Лөгөй лиссиэй үөрэнээччилэрэ үрдүк көрдөрүүлэннилэр.
Биһиги лиссиэйбититтэн 4-с кылаас үөрэнээччитэ Күннэй Хабарова 1 миэстэни ылан барыбытын үөртэ, учуутала Наталья Семеновна Олесова. 5-с кылаас үөрэнээччитэ Слава Карманов 2 миэстэни ылары ситистэ, учуутала Надежда Афанасьевна Лугинова. 7-с кылаас үөрэнээччитэ Марина Маглысова 3-с бочуоттаах миэстэҕэ тигистэ, 8-с кылаас үөрэнээччитэ Алекса Попова 2-с миэстэни ылла, учууталлара Екатерина Дмитриевна Попова. Авелина Ушницкая анал аакка тигистэ. Аны билигин кэтэхтэн ыытыллыбыт олимпиада түмүгүн долгуйа күүтэбит.
Математика курдук устуук предмети сөбүлүүр, бүгүҥҥү уустук сорудахтардаах олимпиада кыайыылаахтарын уонна кинилэр учууталларын эҕэрдэлиибит.
Павел ГЕРАСИМОВ, VIII кылаас Лөгөй лиссиэй-интернат, «SiTiM» LegMedia» юнкора, Уус Алдан
Родион Перевалов, Коля Марков хаартыскалара
Олимпиада туһунан кэпсиир хаартыскалары манна көрүҥ https://postimg.cc/gallery/9RMpm7w