Балаҕан ыйын 27 күнэ — Саха Өрөспүүбүлүкэтин Судаарыстыбаннаһын күнэ. Бары биир сомоҕо буолан, дойдубутунан киэн туттуубут күүркэйэр кэмэ. Афанасий Осипов аатынан Бэрдьигэстээх орто оскуолата Судаарыстыбаннас күнүгэр ордук үрдүк суолта ууран, сылын аайы үгэс быһыытынан араас хабааннаах тэрээһиннэри ыытар.
Ол курдук, бу күн улуус мунньаҕын депутаттарын кытта көрсүһүү, оскуолабыт «Түмэн» правовой түмсүүтүн эдэр чилиэннэрэ Дьокуускай куоракка олохпут сүрүн сокуоннара буһан-хатан тахсар Ил Түмэн депутаттарын уораҕайдайыгар экскурсиялара, кылаас чаастара ыытыллаллар.
Бу улахан суолталаах күнү быйыл уратытык бэлиэтээтибит. Оскуолабыт 11 кылааһын үөрэнээччилэрэ Нам улууһун Хатырык нэһилиэгэр саха чулуу уола Максим Кирович Аммосов түмэлигэр сылдьан кэллибит. Түмэл үлэһиттэрэ, Хатырык оскуолатын 11 кылааһын үөрэнээччилэрэ олус истиҥник көрүстүлэр.
Түмэлгэ сылдьан Сахабыт сирин биир кэрдиис историятын билэн, ол кэмнээҕи дойдуларын сайдыытын иһин олохторун толук уурбут дьон туһунан сөҕөн, билиибит өссө биир харыс үрдээбит, чиҥээбит курдук санананныбыт. Сэдэх экспонаттар, хаартыскалар кистэлэҥ кэпсээннэрин түмэл директора Александр Васильевич Кириллин биһиэхэ олус интэриэһинэйдик сэгэтэн арыйда.
Александр Васильевич билиитэ элбэҕэ, хас биирдии мал, историческай докумуон ымпыгар-чымпыгар тиийэ билэрэ кини кэпсээнигэр өтө көстөр. Түмэл билиҥҥи кэм ирдэбилигэр сөп түбэһиннэрэн тас-ис көстүүтэ барыта саҥа, түмэл информационнай технологиянан хото хааччыллыылааҕа ыалдьыт болҕомтотун тардыан тардар. Аҥардас түмэл киинин эркинэ Гиннес рекордугар киириэн сөптөөх саха былааҕа тэлимнии турарын курдук көстөрө, ханнык баҕар киһини сөхтөрөр.
Тэрээһиммит иккис аҥаарыгар Хатырык нэһилиэгин оскуолатын үөрэнээччилэрин кытта көрүстүбүт. Манна түмэл научнай үлэһитэ Станислав Александрович Дьяконов уонна нэһилиэк библиотекатын библиотекара Татьяна Арыйаановна Местникова өрөспүүбүлүкэбит устуоруйатыттан оонньуу ыыттылар, билиибитин тургутан көрдүлэр. Түмүгэр саастыы оҕолорбутун кытта чугастык билсэн, инникитин өссө да күрсүөх буолан тарҕастыбыт.
Маннык тэрээһиннэр салгыы ыытыллаллара олус наадалаах, эдэр киһи илэ хараҕынан көрдөҕүнэ-иһиттэҕинэ эрэ өйүгэр, сүрэҕэр хаалар диэн учууталларбыт этиилэрэ бигэргэтилиннэ.
Түмэл салайааччытыгар Александр Васильевичка барҕа махталбытын тириэрдэбит, түмэл сайдарыгар баҕа санааларгыт олоххо киирэ турдуннар.
Леонид ИВАНОВ, Афанасий ОСИПОВ, аатынан Бэрдьигэстээх орто оскуолатын 11 кылааьын үөрэнээччитэ, «Бэртschool»пресс-киинин эдкордара.