Ньурба оройуонугар сылын аайы World Skills хамсааһын иһинэн ыытыллар “Ветеринария” түһүмэх үгэс быһыытынан Сүлэ агро хайысхалаах оскуолатыгар буолан ааста. Мин онно маҥнайгы бочуоттаах миэстэни ыламмын үөрүүм үгүс!
Биһиги 5 модульга холонон көрдүбүт: маститка анаалыс, иик анаалыһа, сымыыты овоскопиялааһын, шовтар араастара уонна кыыллар ыарыылара. Маҥнайгы кыттыым буолан олус долгуйбутум. Ол эрэн медицинскэйга туттарсарга бэлэмнэнэ сылдьар буоламмын, син эрэл санаалаах этим. Күрэхтэһии олус тыҥааһыннаах буолбута. Кыттааччылар бары да уопуттаах, хаһыс да кыттааһыннара этэ. Бүтэһигэр диэри ким кыайара биллибэтэ. Онтон түмүгү билиһиннэрбиттэригэр, наһаа да үөрбүтүм!
Салайааччыбар Чемчоева Антонина Юрьевнаҕа олус улаханнык махтанабын. Кини киэҥ билиилээх, бэйэтэ ветеринар үөрэхтээх, уопуттаах буолан миигин маннык ситиһиигэ аҕаллаҕа. Билигин куоракка республиканскай этапка кыттарбын долгуйа күүтэ сылдьабын.
Таня Иванова, «Ыллык» эдкорпост,
Хаҥалас, Ньурба.