Сайын кэлэн, күн уһаан, айылҕа симэҕэ чэлгийэн, оҕолор үөрүүнэн туолар кэмнэригэр, Кэбээйи орто оскуолатын иһинэн «Сыккыс» үөрэх лааҕыра аанын тэлэччи арыйар.
Манна оҕолор сахабыт тылын, култууратын байытар, төрөөбүт дойдубут историятын дириҥэтэн үөрэтэр кыахтаналлар. Саха тылын учуутала Егорова М.И. уонна төрөппүттэр Кобякова И.Г. уонна Петров А.Е. салайыылаах кырыымпа тыаһа, табык ньиргиэрэ дууһаны үөрдэр, сүргэни көтөҕөр.
Оттон Терехова А.П. салайыылаах олоҥхо лааҕыра эмиэ ураты эйгэ. Оҕолор саха омук улуу айымньытын кытта билсэллэр, олоҥхоһут буолар холонуулара саҕаланар. Манна кинилэр хоһоону айарга, артыыс быһыытынан бэйэлэрин көрдөрөргө үөрэнэллэр. Олоҥхо – саха норуотун үйэлээх муудараһа, кини кэлэр көлүөнэлэргэ бэриллэр ытык иэһэ.
Лааҕыр үлэтин чэрчитинэн оҕолор Кыайыы 80 сылыгар аналлаах улуустааҕы ыһыахха, эһиил ыытыллыахтаах Олоҥхо ыһыаҕар күүстээхтик бэлэмнэниэхтэрэ. Маны таһынан, оҕолорго анаан араас тэрээһиннэр ыытыллыахтара: викториналар, күрэхтэр, айылҕаҕа экскурсиялар. Оҕолор бииргэ сылдьан доҕордоһуохтара, санааларын үллэстиэхтэрэ, бэйэ-бэйэлэригэр көмөлөһүөхтэрэ. Бу манна кинилэр бэйэ бэйэлэрин өйдүүргэ, аһынарга, таптыырга үөрэнэллэр.
Онон, «Сыккыс» лааҕыр оҕо сайдыытыгар улахан суолталаах. Манна кини айар дьоҕура арыллар, билиитэ кэҥиир, сахалыы тылынан сааһылаан толкуйдуур үөрүйэҕэ сайдар.
Сайын аайы лааҕыр эдэр ыччаты түмэр, кинилэр сахалыы тыыннаах, төрөөбүт дойдуларыгар бэриниилээх дьон буола улааталларыгар кыах биэрэр. Бу буолар – кэлэр көлүөнэ итэҕэлэ, эрэлэ.
Дуолан ПАВЛОВ, IX кылаас.»Дьоҕур» медиакиин,
Кэбээйи орто оскуолата