«Өркөн» киинэ тыйаатырыгар оҕону эбии үөрэхтээһин киинин иһинэн үлэлиир «Ералашка» студия устубут «Оҕо саас күннэрэ» диэн оҕолорго аналлаах көрдөөх тэттик киинэлэри сүрэхтээһин буолла.
«Ералашка» оҕо студията аан бастаан 2011 сыллаахтан үлэтин саҕалаабыта. Евдокия, Иван Окоемовтар сайыҥҥы сынньалаҥ кэмигэр хас сайын аайы оҕолору мунньан оҕо балаһааккалары тэрийэн оҕолорго анаан киинэлэри устар буолбуттара. Бастакы киинэлэрин Чараҥ оскуолатын «Палитра» лааҕырыгар уһулбуттара. Онтон ыла номнуо 14 сыл ааһа охсубут.
Сайыҥҥы лааҕырга уопсайа 9 тэттик киинэни устубуппут. Киинэлэри бэйэбит олохпутуттан көрдөөх түгэннэри түмэн оҕолор суруйбуппут. Мин 3 киинэҕэ уһуллубутум. «Эҕэрдэ» киинэҕэ костюмер оруолун толорбутум. Арина Винокурова суруйбут сценарийдаах «Ыалдьыт» киинэни Даша Бурнашева дьиэтигэр устубуппут. Бу киинэ 2024 сылга «Белый олененок» республиканскай оҕо искусствотын бэстибээлигэр «Киноискусство» хайысхатыгар Гран-при буолары ситиспитэ.
Киинэҕэ уһуллар олус интэриэһинэй эрээри, сылаалаах эбит. Бары тэҥ саастыылаах, дьүөгэлии кыргыттар буолан, кыраттан да күлэн, бэйэ-бэйэбитин дьээбэлэһэн, хос-хос устубуппут. Сүрэхтэниигэ Гран при буолбут грамоталарбытын оҕолорго туттартаабыттара. Көрөөччүлэр «Ералашкабытын» олус сөбүлээтилэр.
Лиза ГОТОВЦЕВА,
V кылаас,
«Өркөн» оҕону эбии үөрэхтээһин киинин иитиллээччитэ,
Уус Алдан