Үөһээ Бүлүүгэ Тамалакаан агро оскуолатыгар «Ромашка» сайыҥҥы лааҕыр үлэлиир. Сынньалаҥ лааҕырыгар 35 оҕо араас сатабылларга үөрэнэллэр, ону таһынан оскуола оҕуруотугар көмөлөһөллөр: сибэккилэргэ, оҕуруот аһыгар уу куталлар, сыыс отун ыраастыыллар. Билигин күөх луук номнуо ситэн, оҕолор быһан, тууһаан нэһилиэнньэҕэ атыыга таһаардылар.
Ойууртан хаптаҕас, дьэдьэн сэбирдэхтэрин хомуйан, хатаран, бары ирдэбилин (ферментациятын) тутуһан битэмииннээх чэй оҥордулар. Алаастан ньээм от сибэккилэрин үргээн мүөт оҥорбуттарын олохтоохтор хамаҕатык атыыластылар. Бу курдук оҕолор сынньана таарыйа билэр-көрөр үөрүйэхтэрин сайыннараллар, туһалааҕынан дьарыктаналлар, чэгиэн-чэбдик буоларга дьулуһаллар.
Айыына Петрова, VII кылаас, «Эрчим» медиакиин, Дүллүкү, Үөһээ Бүлүү