Волейбол – киһи-аймах бары сэргиир, кэрэхсиир, дьон сөбүлээн оонньуур спордун көрүҥэ. Олунньу 9 күнэ — Волейбол төрөөбүт күнүнэн ааҕыллар.
Волейбол күнүгэр анаан олунньу 7 күнүгэр Чурапчы оскуолаларын икки ардыгар улуустааҕы волейбол чемпионата буолан ааста. Биһиги оскуолабытыттан уопсайа 13 оҕо кыттыыны ыллылар.
Уйгун Новгородов уонна Сандал Мохначевский, X кылаас үөрэнээччилэрэ:
– Үтүө күнүнэн! Эһиги кыргыттар, уолаттар хамаандаларын туруоран, улуустааҕы волейбол чемпионатыгар кыттан кэллигит. Күрэх ханна буолан ааста?
– Үтүө күнүнэн! Улуустааҕы волейбол күрэҕэ Чурапчы улууһун Хадаар нэһилиэгэр буолан ааста. Уолаттар күрэхтэрэ Хадаар спорт саалатыгар, онтон кыргыттар киэннэрэ Хадаар орто оскуолатын саалатыгар буолла.
– Төһө элбэх оскуола кытта кэлбитий? Хамаандаҕа хаһыа буолан барбыккытый?
– Уолаттарга 7, кыргыттарга 6 хамаанда күөн көрүстэ. Биһигиттэн 7 уол, 6 кыыс кытта барбыппыт.
– Эһиги кимнээҕи кытта кииристигит?
– Уопсайа 4 хамаанданы кытта кииристибит. Болтоҥо хамаандатын 2:0, Бахсы хамаандатын 2:1, Хайахсыт хамаандатын 2:0 кыайбыппыт. Финалга бэйэбит курдук күүстээх утарылаһааччылары кытта маҥнайгы миэстэни былдьаспыппыт. Ыһыылаах-хаһыылаах оонньуу түмүгүнэн Мырылалартан 2:1 хотторон, бочуоттаах 2 миэстэҕэ тигистибит.
– Төһө бэлэмнээх барбыккытый?
– Биһигини физкультурабыт учууталлара Александр Алексанрович Христофоров, Станислав Иванович Сивцев күүстээхтик көтүппэккэ бэлэмнээн, ситиһиилээхтик оскуолабыт чиэһин көмүскээтибит.
– Кыргыттар хайастылар?
– Кыргыттарбыт эмиэ олус бэркэ кытыннылар: 6 хамаандаттан 4 миэстэ буолбуттара.
– Ситиһиигитинэн эҕэрдэ! Өссө да кыайыы-хотуу эһигинниин эҥэрдэстин.
– Махтал!
Дайаана Говорова, X кылаас,
«Алаҕар Кэскилэ» медиа киин,
Г.Д. Протодьяконов аатынан Алаҕар орто оскуолата,
Чурапчы