Коля Сыромятников Дьокуускайга “Энергетик” куорат таһынааҕы чэбдигирдэр лааҕырга үөрэнэ, сынньана сылдьар. Кини Авксентий Егорович Мординов аатынан Тааттатааҕы лиссиэй үөрэнээччитэ. Быйыл IX «В» кылааһы бүтэрбит. Биһиги Николай Сыромятниковы көрсөн интервью ыллыбыт.
– Коля, дорообо! Бэйэҥ тускунан, баһаалыста, билиһиннэриэҥ дуо?
– Мин Тааттаттан Ытык Күөлтэн сылдьабын. Быйыл 9-с кылааспын этэҥҥэ түмүктээн, 10-с кылаас буоллум. Ийэм Анна Николаевна Сыромятникова историк идэлээх учуутал, социальнай педагогунан үлэлиир. Бииргэ төрөөбүт иккиэбит. Балтым Диана 8-с кылааһы бүтэрдэ.
– Эн бэйэҕин атыттартан ураты оҕобун диэн сананан ааспыт кэмнээххин дуо?
– Суох, мин хаһан да бэйэбин уратыбын, атыммын диэн санамматаҕым. Хайдах баарбынан оҕолору кытта тэҥҥэ үөрэ-көтө, кэпсэтэ, оонньуу сылдьабын. Мин оҕо сааһым наһаа үчүгэй, дьоллоох.
– Эйигин суруйарга, тугу барытын сатаан туттарга ким үөрэппитэй?
– Ийэм үөрэппитэ. Мин киниэхэ наһаа махтанабын. Онтон телефоммунан туттарга бэйэм үөрэммитим. Киһи сатыырын киһи сатыахтаах дии саныыбын. Ол суох, бу суох, ити тиийбэт диэн олоруо суохтааххын.
– Тугунан сөбүлээн дьарыктанаҕыный?
– Футболунан, волейболунан сөбүлээн дьарыктанабын.
– Туох идэлээх киһи буолуоххун баҕараҕыный?
– Билигин бу диэн билбэппин, сатаан таайбакка сылдьабын. Ол гынан баран үчүгэй киһи буолуохтаахпын чопчу билэбин.
– Эн бу олоххо саамай улахан баҕа санаан тугуй?
– Мин бу олоххо улахан баҕа санаам баар. Ол туһунан улаханнык кэпсиэхпин баҕарбаппын. Учуонай Андрей Саввич Саввиновы кытта көрсөн бараммын, ол баҕа санаам туоларыгар элбэхтик үлэлиэхтээхпин өйдөөтүм.
Бүгүн, атырдьах ыйын 7 күнүгэр, биһиги Саха өрөспүүбүлүкэтин Национальнай бибилэтиэкэтигэр экскурсияҕа сылдьыбыппыт. Саха сирин туһунан викторинаҕа Коля саамай элбэх сөптөөх хоруйу биэрэн, бибилэтиэкэ анал бирииһин тутта. Эҕэрдэлиибит!
Интервьюну ыллылар Карина АММОСОВА, VI кылаас,
М.Н. Готовцев аатынан Танда орто оскуолата, Уус Алдан;
Аэлита ФЕДОРОВА, VII кылаас,
Ф.К. Попова аатынан Баатара орто оскуолата, Мэҥэ Хаҥалас