Сэтинньи 23 күнүттэн ахсынньы 7 күнүгэр дылы өрөспүүбүлүкэбит лидер оҕолоро «Сосновый бор» сынньанар-чэбдигирэр кииҥҥэ кэлэн доруобуйабытын бөҕөргөтө сылдьабыт.
Сарсыарда аайы зарядкалыыбыт, кислороднай коктейль иһэбит, туустаах хоско олоробут. Сүлүөппүт аата «Я — лидер», манна оскуола лидердара, актыбыыстара бааллар.
Мэҥэ-Хаҥаластан үһүөбүт: Хаптаҕайтан, Алтантан уонна Чыамайыкыттан. Уопсайа 80-тан тахса оҕо баар. Манна биһигини 4 академияҕа араарбыттара. Биирдии академияҕа 25 оҕо баар. Академиялар аат, девиз толкуйдаабыттара. Мин баар академиям «Феникс» диэн.
Бастакы-икки күн оҕолор бэйэ-бэйэбитин кытта билсиспиппит. Бары актыыбынай, дьулуурдаах, талааннаах оҕолор кэлбиттэр. Хас күн аайы саҥа тэрээһиннэр буолаллар. Ону баһаатайдарбыт ыыталлар. Холобура, Россия ийэлэрин күнүгэр оҕолор плакат, видео-эҕэрдэ, эҕэрдэ нүөмэр оҥордубут.
Маннык тэрээһиннэр оҕолору түмэр, уопут атастаһарга көмөлөһөр, талааннарын арыйар.
Аайа МАКАРОВА, 9 кылаас үөрэнээччитэ, «Проба пера» эдэр кэрэспэдьиэнэ,
Чыамайыкы, Мэҥэ-Хаҥалас.