Ил Дархан Харыйатыгар Мэҥэ-Хаҥалас улууһун Чыамайыкы орто оскуолатыттан үөрэххэ уонна спортка үрдүк көрдөрүүлэрин иһин 10 кылаас үөрэнээччитэ Сайаана Захарова ыҥырыы тутан бу күннэргэ Дьокуускай куоракка айаннаата.
Сайаана алын кылаастан оскуола туйгун үөрэнээччитэ, бастыҥ спортсмена. Кини араас күрэхтэргэ, олимпиадаларга ситиһиилээхтик кыттар. Быйыл улуустааҕы политехническай олимпиадаҕа 2 миэстэ буолла. Хабылык уонна хаамыска көрүҥүнэн утумнаахтык дьарыктанар, үгүс мэтээллээх, Мэҥэ-Хаҥалас улууһун бастакы лигатын чилиэнэ. Өссө спорт көрүҥүттэн волейболу ордорор, ол курдук Чыамайыкы орто оскуолатын кыргыттар волейболларын хамаандатын капитана. «Проба пера» кэрэспэндьиэнэ, оскуолабыт «Чиккэстэр» КВН хамаандатын чилиэнэ, 10 кылаас старостата буолар.
Түгэнинэн туһанан Сайаанабытын «Проба пера» кэрэспэндиэннэрин аатыттан эҕэрдэлиибит. Саҥа билсиһиилэри, сонун арыйыылары, чаҕылхай түгэннэри баҕарабыт.
Азиза Копырина,
9 кылаас үөрэнээччитэ, «Проба пера» эдкора, Чыамайыкы Мэҥэ-Хаҥалас.