Куйаар ситимигэр Инстаграмҥа Үөһээ Бүлүү улууһун «Тускул» оҕо айымньытын киинин иһинэн үлэлиир «Саҥа Step» телерадио студия оҕолоро устубут сахалыы, сиппит-хоппут, дьоһуннаах муултуктара дьон болҕомтотугар таҕыстылар.
Быйыл иккис сылын бу студияҕа дьарыктанар 5-с кылаас үөрэнээччитэ Настя Степанова Д.К. Сивцев-Суорун Омоллоон “Хараҥаҕа тыкпыт сырдык» кэпсээнин муултук гынан, дьонун пластилинынан оҥорон, айылҕатын толору арыйан, чыычаахтар саҥаларын, муусуканы киллэрэн, айылҕаны таба уруһуйдаан, кэпсээн геройдарын кэпсэтиилэрин олус үчүгэйдик оруолларынан аахтаран, элбэх көстүүлээн дьоһуннаах сахалыы муултугу оҥорбут.
Иккис сылын дьарыктанар Настя сатабыла элбээн, талаана тахсан иһэрэ киһини үөрдэр. Оҕолорбут сахалыы тылынан маннык таһымнаах муултуктары оҥорор буолбуттара олус кэрэхсэбиллээх. Маннык үлэлэр кэмигэр сыаналаннахтарына, болҕомтоҕо ылылыннахтарына, оҕолорбут айар үлэлэрэ өссө киэҥ ыллыктардаах буолуох этэ.
«Хараҥаҕа тыкпыт сырдык» кэпсээнтэн оҥоһуллубут муултугу саха тылын учууталлара үөрэтэр уруоктарыгар, начаалынай кылаас учууталлара кылаас таһынааҕы ааҕыыга, оҕо уһуйааннарыгар бэлэмнэнии бөлөхтөргө көрдөрөн үөрэтэр матырыйаал быһыытынан көҥүл туттуохха сөп. Сахабыт суруйааччылара оҕолорго аналлаах остуоруйаларыттан, кэпсээннэриттэн маннык муултуктары оҕолорбут оҥорон таһаараллара буоллар, кинигэ ааҕыытыттан тэйэн эрэр көлүөнэ оҕолор интэриэһиргээн, саха суруйааччыларын аймньыларыгар чугас буолуох этилэр.
«Саҥа Step» телерадио студия оҕолоро харахтыын уоттанан, сүргэлэрэ көтөҕүллэн туран бу күннэргэ аны саҥа дьылга аналлаах, кыһыҥҥы тиэмэҕэ, профессионал муултук оҥорооччулартан туох да итэҕэһэ суох перекладка ньыматын туттан, кумаахынан кырыйан, устар фоннарын, матырыйаалларын барытын бэлэмнээн, үлэ үөһүгэр сылдьаллар, муултук устуутунан умсугуйан туран дьарыктаналлар. Тускул Васильев, Максим Касьянов — 5 –с кылаас үөрэнээччилэрэ, Белла Степанова — 3-с кылаас үөрэнээччитэ. Кинилэр оҕолорго анаан саамай интэриэһинэй муултуктары бэлэх оҥороллоруттан олус үөрэллэр, астыналлар. Тускул Васильев, Настя Степанова пластилинынан Саҥа дьыл бырааһынньыгын көрсө саҥа муултук усталлар. Салайааччылара — оҕолорго олус чугас, талааннаах педагог, элбэх идеялардаах киһи Анна Павловна Григорьева.
Араас ньыманы туттан муултук оҥоруу кистэлэҥнэрин, сатабылларын баһылаан эрэр кырачаан айар куттаах доҕотторбутугар үүнэр сылга үгүс ситиһиилэри, интэриэһинэй муултуктары, элбэх көрөөччүлэри баҕарабыт!
Валентина ФИЛИППОВА.
https://верхневилюйск-газета.рф/article/35170