Олунньу 2 күнүгэр Мэҥэ Хаҥалас улууһун Майа нэһилиэгэр буолан ааспыт “Саас” форумҥа кытта барабыт диэн эрдэттэн бэлэмнэммиппит. Олунньу 2 күнэ буоларын олус күүппүппүт.
Ол гынан баран, айаммыт табыллыбатаҕа. Ол да үрдүнэн санаабытын түһэрбэккэ, биир түмүккэ кэлэ охсон, форумҥа кэтэхтэн кыттынныбыт. Аара автобуспут алдьанан, Чурапчыга төттөрү айаннаан кэлээт да, хомуна охсон, Александр Федотов аатынан спортивнай комплекса тиийбиппит. Манна иккис күнүн ыытылла турар В.Н. Кривошапкин аатынан волейбол өрөспүүбүлүкэтээҕи күрэхтэһиитин туһунан кэпсиир видео уһулбуппут https://vk.com/wall-199463452_17079
Ханнык баҕарар түгэҥҥэ кыайыылаах өттүн көрөн, быһаарыныы ылынарга үөрэннибит. Видео уһуларга уонна спорт тэрээһинин сырдатыыга сатабылбытын сайыннардыбыт, билиибитин-көрүүбүтүн хаҥаттыбыт. “Саас” форум инникитин бэйэбитигэр көмө буолар элбэх кыаҕы, билиини биэрдэ, олох араас түгэннэригэр мөлтөөн биэрбэт күүстээх санааны иҥэрдэ.
Миэстэтигэр тиийэн маастар-кылааска сылдьыбыт оҕолор элбэҕи истибит, билбит буолуохтаахтар.
Оҕолор араас хайысхаларга бэйэлэрин холонон көрөллөрүгэр, арыйалларыгар уонна сайдалларыгар маннык тэрээһиннэри өссө да ыыта туруоххутун баҕарабыт.
Арина СОТНИКОВА, Юлия ДЬЯЧКОВСКАЯ, Вилена СТРУЧКОВА,
Уля СТЕПАНОВА, Винея БАРАШКОВА, «Тумус кыһа» медиа хамаанда¸
С.К. Макаров аатынан Чурапчы гимназията