2019 сыллаахха өрөспүүбүлүкэ бастыҥ учууталынан Уус Алдан улууһун Суотту оскуолатын историяҕа учуутала Роман Оконов ааттаммыта. Кини билигин Россиятааҕы «Сыл учуутала” куонкуруска кытта сылдьар. Суотту оҕолоро учууталлара Москваттан ситиһиилэнэн кэлэрин күүтэллэр. 11-с кылаас үөрэнээччитэ Алина Мурукова суруйар.
Учууталбытынан киэн туттабыт
Билии-көрүү дойдутугар сиэтэн киллэрэр ураты киһи — Учуутал! Учууталтан саҕаланар оҕо үөрэххэ-билиигэ тардыһыыта, кэрэҕэ-сырдыкка уһуйуллуута, идэтин сөпкө талан, инники олоҕун түстээһинэ!
Биир оннук киэҥ билиилээх, уһуйааччы буоларга айылҕаттан ананан төрөөбүт эдэр учууталбыт туһунан кэпсиэхпин баҕарабын.
Интернет нөҥүө Суотту оскуолатыгар миэстэ баарын көрөн, ыраах Калмыкияттан Саха сиригэр кэлэн, сэттис сылын история, обществознание учууталынан Уус-Алдан улууһун Суотту орто оскуолатыгар үлэлии сылдьар Роман Николаевич Оконов – оҕо-аймах сөбүлүүр учуутала.
Кини өссө «Экономика и право» бэридимиэти үөрэтэр. Биһиэхэ, оскуоланы бүтэрээччилэргэ, элбэх билиитин иҥэрэн, бэйэтин олоххо уопутун, баай билиититтэн бэрсэн, инники олохпут ситиһиилээх буоларыгар эрэнэр уонна кыһаллар. Кини уруоктара ураты методикалаах, баай ис хоһоонноох буолар, өрүү саҥаны, сонуну, интэриэһинэйи билэн тахсаҕын. Хас уруога барыта – туспа айымньы. Ол курдук ардыгар биһигини хамаандаларга араартаан үөрэтэр, хас биирдии оҕо бэйэтин санаатын аһаҕастык этэригэр дьулуһан, элбэх диспуту, дискуссияны ыытан, мөккүһүннэрэн, ырыттаран, историяны өйдөтөр.
Биһиги билиҥҥи аныгы үйэҕэ бэлэмнээх, араас ресурстары баһылаабыт, коммуникабельнай дьон буоларбыт туһугар сыаллаах-соруктаах үлэлиир. Мин кини хас биирдии уруогун олус умсугуйан туран истэбин, эбии дьарыктарга, олимпиадаларга кыттабын.
Учууталбыт идэтигэр уһулуччу бэриниилээх. Элбэҕи ааҕа, билиитин кэҥэтэ сылдьар, элбэх күрэхтэһиилэргэ кыттан, уопутун тарҕатар. Учуутал быһыытынан үрдүк культуралаах, улуу нуучча тылынан ыраастык санаабытын этэргэ-саҥарарга үөрэттэ, көрсүө-сэмэй быһыыны, киһилии чиэһинэй сыһыаны өрө тутар, үлэҕэ-үөрэххэ тардыһыылаах буоларга угуйар.
Киниэхэ үөрэниэхпиттэн ыла история уонна обществознание уруоктарын олус сөбүлүүбүн. Роман Николаевиһы күүстээх, үтүө санаалаах уонна кэрэ өйдөөх-санаалаах, киэҥ көҕүстээх, тулуурдаах, дьулуурдаах, санаабытын олоххо киллэрэр личность быһыытынан ылынабын, холобур оҥостобун.
Убаастыыр учууталбыт «Сыл бастыҥ учуутала» Россиятааҕы күрэххэ Саха сирин аатын көмүскүү барда. Киниэхэ үрдүктэн үрдүк ситиһиилэри баҕарабыт! Инникитин да талаанынан, билиитинэн үгүс оҕо ытыктабылын уонна интэриэһин тардыаҕа диэн эрэнэбит.
keskil14.ru