Ытыктабыллаах учууталлар, төрөппүттэр уонна устудьуоннар! СӨ үөрэҕин уонна наукатын министиэристибэтин кэлэктиибин уонна тус бэйэм ааппыттан үөрэх саҥа дьыла саҕаламмытынан итиитик-истиҥник эҕэрдэлиибин!
Быйылгы үөрэх дьылыгар саҥа усулуобуйалардаах үктэнээри сылдьабыт. Ону ол диэбэккэ, өрөспүүбүлүкэбит хас биирдии оскуолаларыгар үөрэх хайаан да да ыытыллара былааннанар. Биһиги бу тирээн турар балаһыанньаҕа толору үөрэнэр, кылгас кэмнээх ыарахаттары бииргэ этэҥҥэ туоруурга бэлэммит уонна сотору кэминэн пандемия бүтүөҕэ диэн эрэнэбит.
Күндү доҕоттор, балаҕан ыйын 1 күнэ – инникигэ суолу арыйар уонна олох биир саҥа түһүмэҕэр үктэнэр биир саамай суолталаах күн. Оскуола уонна устудьуон сыллара хас биирдии киһи сүрэҕэр сөҥөр сөҕүмэр дьикти арыйыыларынан, үгүс үөрүүнэн-көтүүнэн толору буолар. Бу үөрэх дьылыгар 16 027 кырачаан оскуола боруогун атыллыа, паартаҕа олоруо.
Ытыктабыллаах учууталларга уонна үөрэх эйгэтин үлэһиттэригэр кыһамньылаах үлэҕит иһин улахан махталбын тиэрдэбин. Эһиги сыралаах үлэҕит түмүгүнэн үгүс көлүөнэ дьоһуннаах дьоно иитиллэн тахсыбыта.
Күндү үөрэнээччилэрбит уонна кинилэр төрөппүттэрэ, бу кэми эһиги кимнээҕэр да күүскэ күүппүккүт. Оҕолорго саҥаттан саҥа чаҕылхай билиини-көрүүнү, бэһиэлэй кэмнэри, онтон төрөппүттэргэ тулуурдаах буолууну баҕарабын.
Күндү бастакы хараҥаччыларбыт, бастакы кылаас үөрэнээччилэрэ, эһиги бу сылга оскуола диэн ааттанар олоххут биир саҥа кэрдииһигэр үктэнэҕит. Мин эһиэхэ хас биирдии кыра да суолталаах түгэни сыаналыыргытыгар баҕарыам этэ. Үйэ-саас тухары өйтөн, сүрэхтэн сүппэт кэрэ өйдөбүллэр барыта кыраттан саҕыллалларын умнумаҥ.
Убаастабыллаах устудьуоннар, эһиги олоххут биир саамай кэрэ кэмигэр сылдьаҕыт. Талан ылбыт идэҕит үөрэҕэр сылтан сыл билиигитин хаҥатыҥ. Устудьуон сыллара бастакы ыраас тапталы, эрэллээх доҕоттору, бастакы тус быһаарыныылары кытта сибээстээхтэр. Бу эдэр саас кэмэ эһиэхэ кэрэ түгэннэринэн эрэ туоларыгар ис сүрэхпиттэн баҕарабын!
Билии күнүнэн, саҥа үөрэх дьыла саҕаламмытынан өссө төгүл эҕэрдэлиибин!